استان ءِ شوربندی ءُ مئے مارِشت
نبشتہ کار : نوکند بلوچ
دی بلوچستان پوسٹ
ما داں سَر چست کُتگ ھر روچ ھمے جنجالانی نیام ءَ ساہ زرتگ، برے سیادے، برے ھم ساھگے ، برے براتے ءُ برے سنگتے، کُشگ بوتگ، گار ءُ بیگواہ کنگ بوتگ، یا کہ گوں ژندیں بالاد ءُ کَشتگیں ناکُن ءُ نیم توامیں ھیلاں گوں چہ کرنانی زندان ءِ سپر ءَ واتر بوتگ آ ھم نیم زِندگ۔
اے انوگیں گپے نہ اِنت کہ مردم بیگواہ کنگ بوھگ ءَ اَنت کوشگ بوھگ ءَ انت، بلکیں اے بیماری ءَ ھما روچ ءَ سر چِست کُتگ کہ اے زمین ءِ زوراکانی ھرجان بوتگ (27march 1947)، داں ھما روچ ءَ بگر داں روچ ءِ مروچی ھمے کِسہ ءَ ئے روانی برجم اِنت کُشت ءُ ھون، گارءُ بیگواہی، ژانگولیں جون درُست لَس مردمانی ھرروچیگیں زندمان ءِ بَھر جوڑ بوتگ اَنت، انچو سماہ بیت کہ لَس مردم ھر ساھت انچیں ھال ءُ اھوال ءِ ودار ءَ اَنت کہ کدی نوکتریں انچیں ھال کئیت کہ گیش تورناک تر اِنت۔
بلے مارہ شموشکار بوھگی نہ اِنت کہ اے دُرست استان ءِ وتی اسپانک (بیانہ) اِنت کہ لَس مھلوک ءِ میان ءَ انچیں رَوشت ءِ جوڈ بہ بیت کہ لَس مردُماں اے رنگیں باوست ءُ ساھتاں چہ ھچ رنگیں اَسر ءِ مہ کپ ایت، تھنا اِدا نہ بلکیں اے رنگیں اسپانک (Narrative ) مارا گوست ءَ ھم گِندگ ءَ کائینت کہ ھمود ءَ سامراجاں ھمے رنگیں رَوشت جوڑ کُتگ ءُ آشوب یا جنُزانی میان ءِ نِزوری پیداک کنگ ءِ جھد کُتگ، پہ درور ( الجئریا آ پرنچ پرنچ سامراج ءَ)، ( انڈیاہ آ بریٹش سامراج ءَ) یا آدگہ مُلک کہ سامراجانئ ایر دست بوتگ اَنت انچو کہ ویتنام، کینیا، کانگو، ءُ فلفائیں، اے دُرستیں ھندانی نیام ءَ ھمے رنگیں شوربندی جوڑ کنگ بوتگ کہ ھمود ءَ ( psychological normalization tactics ) کارمرز کنگ بوتگ اَنت ءُ لَس مردمانی زھن ء- کُنٹ کنگ ءُ ھادی کنگ ءِ شوربندی یےدیما ھارگ بوتگ انت۔
مرچی ھمے رنگیں شوربندی ماں بلوچ لَس مھلوک ءِ میان ءَ جاہ کنگ ءَ اِنت کہ ھودا مَرگ، کُشت ءُ ھون گار ءُ بیگواھی تھنا پہ لَبز پشکپتگ، مردمانی سِنچ، مارِشت، دُرست ھلاس بوتگاں، سنگت ءِ بیگواہ بوھگ اِنت جیڑہ ءِ نہ واتر بیت، سیاد کشگ بوھگ ءَ اِنت، جیڑہ ءِ نہ اِنت جاور ھراب اَنت، بلے اے سما کنگ ءِ جھد ءَ نہ کن ایں کہ پرچہ گار ءُ بیگواہ کنگ بوھگ ءَ اِنت، بلے اے سما وھدی بوھگ ءَ نہ اِنت کہ پرچہ کشگ بوھگ ءَ اِنت، پرچہ بیگواہ اِنت، پرچہ ھر روچ نیم توامیں مردم چہ زندان ءَ واتر بنت کَِسے کئیت ءُ کَسے نئیت ھم۔
اے دُرستیں جوابانی پَسو ایردستی اِنت کہ چو شومک ءِ بیماری ءِ وڑا ایر کپتگ مردمانی اندر ءَ کہ ھودا مارِشت ، ھیال، دُرست زوراک ءِ دست ءِ پنجگ ءَ اَنت۔۔ ھیال بندیگ اَنت، سما مُرتگ، مارِشت ھلاس اَنت، جیڑگ دگرانی باھوٹءَ اَنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-