سَے میجر رینک آفسرانی کُشگ
ٹی بی پی شونگال
بلوچستان ءَ دو ھپتگاں پاکستانی پوج ءِ واستا دردناکیں مَرگے ءِ دروشم بیتگ انت- آواران ءِ دمگ جھاؤ ءَ بلوچستان لبریشن فرنٹ ءِ نیمگ ءَ راہ ءِ بندگ ءُ اُرش ءَ میجر سید ربنواز طارق کُشگ بیتگ ات،ھمے وڑ بنجاھی شھر شال ءَ جبل نور ءِ ھند ءَ بی ایل اے ءِ ایس ٹی او ایس اسکواڈ ءِ لچوکی بمب اُرش ءَ پوج ءِ میجر انور کاکڑ کُشگ بیتگ ات، ھمے وڑ مستونگ ءِ کوھی دمگاں بلوچ لبریشن آرمی ءِ جنگول ءُ پاکستانی پوج ءِ میان ءَ دراجکشیں جنگ ءُ چوپاں پوج ءِ میجر زید سلیم ءَ ھوار بازیں کارندہ کشگ بیتگ ات اَنت-
بلوچستان ءِ آجوئی ءِ واستا پرکاریں سلاہ بندیں گلانی شوربندی اُرشانی توک ءَ گیشی آیگ ءَ پد پاکستان ءِ پوج ءَ را جانی تاوان سکا گیش بوان انت ، ءُ بلوچستان ءِ گچینی شھدگ ھم درگلو انت – ایشی ءِ نوکتریں منانک پاکستان ءِ وزارت داکلہ ءِ پیسلہ انت کہ شیعہ زائرینانی واستا زیارِت اربعین ءِ مول ءَ ایران ءُ عراق ءَ روگ ءِ واستا بلوچستان ءِ زمینی راہ بیمناک گشتگ ءُ ایشی ءِ سر ءَ بندش جتگ –
پاکستان ءِ وزارت ھارجہ، وزارت داکلہ، بلوچستان ءِ سرکار ءُ سیکورٹی ایجنسیانی اے ھواریں پیسلہ ءَ زانگ بیت کہ بازیں کچے ءَ پوجیاں جانی تاوان بیتگ ءُ بلوچ جنگولانی شوربندیاں کوشکاریں اُرشاں پد پاکستان ءِ پوجی ادارہ بلوچستان ءِ گچینی شھدگانی سر ءَ وتی رِٹ ءِ برجم کنگ ءَ بے سوب بیتگ انت-
میجر رینک ءِ آفسرانی مَرگ ءَ بلوچستان ءَ پرکاریں سلاہ بندیں گلانی مھکمیں تاکت ءُ انٹیلی جنس زورانی تچکیں منانک انت- اے کوشکاری نا ایوک ءَ اے گپ ءَ پدر کن انت کہ جنگول نی پوجی درجہ بندی ءِ میانی آفسراں ھم نشانگ کنگ ءِ تاکت ءَ دار انت بلکیں اے ھم ھما اُرشانی ناں بلکیں دراجکشیں شوربندی ءُ سرجمیں اھوالداری ءَ گوں ھوار انت- اے وڑیں جاورھال ریاست ءِ ٹاپار انت کہ بلوچستان ءَ جنگولانی بس کمے تاکت انت، زمین ءِ راستی ءَ گستا انت – سَے میجر رینک آفسرانی مَرگ تچکیں کلوہ انت کہ سلاہ بندیں گل نا ایوک ءَ وتی کاروائی ءِ دیم ءَ برتگ انت بلکیں آ فوجی سرین ءِ سر ءَ نپسیاتی زور دیگ ءِ پوزیشن ءَ ھم سر بیتگ انت-