تربت : پوج ءَ لوگانی سر ءَ بیڑبرتگ، تمپ ءَ مارٹر اُرش

بلوچستان ءِ دمگ کیچ ءِ تھسیل تربت ءِ ھند ناصر آباد ءَ پاکستانی پوج ءَ لوگانی سر ءَ بیڑبرتگ ءُ پٹ ءُ پول کتگ-

دمگی مردمانی رِد ءَ مروچی تھسیل تربت ءِ دمگ ناصر آباد ءَ ھم پوج ءَ سرچ آپریشن ءِ میان ءَ لوگانی پٹ ءُ پول کتگ ءُ دمگی مردم لَٹ ءُ کُٹانی نشانگ کتگ اَنت چریشی ءِ سبب ءَ دمگ ءَ تُرس ودی بیتگ-

تمپ ءِ دمگ میرآباد ءَ پاکستانی پوج ءَ دمگی آبادی سر ءَ ماٹر آس داتگ، آس دیگ بیتگیں بازیں مارٹر گولھاں چہ دو لوگ سر ءَ کپتگ کہ آیانی تہ ءَ یک لوگے ءَ سک تاوان رس اِتگ، وھدے کہ دومی مارٹر گولہ دگہ یک لوگے ءِ سر ءَ کپتگ بلے آ نہ ترکّ اِتگ-

تنی وھدے دمگی انتزامیہ یا پوج نیمگ ءَ چہ وئیل ھچ وڑیں درشان دیم ءَ نیتکگ-

زانگ بہ بیت کہ بلوچستان ءِ دمگ کیچ ءَ اشی ءَ ساری ھم پوج نیمگ ءَ چہ دمگی آبادی سر ءَ مارٹر اُرشانی وئیل دیم ءَ اَتکگ اَنت-

ھمے ماہ دہ جولائی ءَ کیچ ءِ دمگ گورکوپ ءَ پوج ءَ آس داتگ مارٹر یک دمگی گراؤنڈے ءَ کپتگ چریشی ءِ آسر ءَ اود ءَ گوازی کنوکیں دو ورنا بیران بیتگ ءُ پنچ ٹپی بیتگ اَنت-

گورکوپ وئیل ءَ ٹپی ءُ بیران بیتگیں ورنایانی پجّار علی ء غلام، شھباز ء دوستیں، نصیر ء محراب، جمیل ء دلمراد، جمال ء حمید، برکت ء اقبال ءُ وزیر ء غلام علی ناماں چہ بیتگ اَنت-

اِھوالکار رِد ءَ پوج سر ءَ بلوچ آجوئی لوٹوکانی اُرشاں پد پسّھی کاروائی ءَ پوج ءَ دمگی آبادی سر ءَ مارٹر اُرش ءَ سر ءُ دیم تیرگواری کنت، ھمے سال ءِ مارچ ءَ تمپ ءَ بیتگیں دگہ یک انچیں وئیلے ءَ پوج ءَ مارٹر اُرش ءَ سے چُک سک ٹپی بیتگ اَنت-

ھمے وڑ دوھزار بیست دو ءَ تمپ ءَ یک وئیلے ءَ پوج ءِ مارٹر گولہ آبادی سر ءَ کپتگ چریشی ءِ آسر ءَ زالبول ءُ چُکاں ھوار چار مردم ٹپی بیتگ اَنت، پد ءَ ٹپی پوج ءَ وتی دستیگ کتگ ءُ بُنجل ءَ برتگ اَنت-

دوھزار بیست یک ءِ دہ اکتوبر ءَ بلوچستان ءِ دمگ ھوشاپ ءَ ایف سی ءِ نزیکیں پوسٹ ءَ چہ مارٹر گولہ آس داتگ اَت چریشی ءَ چہ ھپت سالی ئیں گونڈو اللہ بخش ء عبدالواحد ءُ پنچ سالی ئیں جنکو شرارتون ء عبدالواحد جاہ پہ جاھی بیران بیتگ اَنت وھدے کہ مارٹر ءِ نشانگ ءَ آیگ ءَ چہ جنکو مسکان ء وزیر سک ٹپی بیتگ اَت-

وئیل ءِ ھلاپ ءَ شال ءَ ھوار سرجمیں بلوچستان ءَ زھرشانی ءُ نندانک داتگ-

ھمے وڑ سال دوھزار ھژدہ ءِ جولائی ءُ اگست ءَ ھم دو جتاجتائیں وئیلاں بلوچ آجوئی لوٹاکانی اُرشاں پد پوج ءَ دمگی آبادی سر ءَ مارٹر آس داتگ-

ھما سال ءَ جولائی ءَ یک گولھے ابوبکر نامیں مردمے ءِ لوگ ءِ سر ءَ کپتگ چریشی ءِ آسر ءَ چُکاں ھوار پنچ مردم ٹپی بیتگ اَنت، وھدے کہ اگست ءَ دگہ یک مارٹر اُرش ءَ جھانزیب نامیں دمگی مردمے ٹپی بیتگ-