بلوچ کھول ءِ سیاسی دزگیریں ءُ زورانسری آوار جنی ءِ ھلاپ ءَ زھرشانی دوازدھمی روچ ءَ ھم برجاہ-
گیشیں ھالانی رِد ءَ، اسلام آباد ءَ نیشنل پریس کلب ءَ رؤکیں سرجمیں راہ یکشل ءَ بند اَنت ءُ پولیس ءِ مزنیں کچے ءَ کارندھاں بلوچ زھرشانی کنوک انگیر ءَ کتگ اَنت- بلے بلوچ کھول سرجمیں اڑان ءُ دلسیاھیاں اَبید وتی زھرشانی ءَ برجاہ داشتگ-
اسلام آباد ءَ گوستگیں دوازدہ روچاں چہ بلوچستان ءَ زورانسری بیگواہ کنگ بیتگیں مردم ءُ سیاسی کیسانی تہ ءَ بندیگ اَنت بلوچ یکجھتی کمیٹی ءِ رھشونانی کھول زھرشانی ءَ اَنت ءَ انساپ ءِ واستا توار چست کنگ ءَ اَنت-
ھمے درگت ءَ نیشنل ڈیموکریٹک موومنٹ ءِ سروک محسن داوڈ ءَ ھوار دگہ سیاسی پارٹیاں، انسانی ھکانی گلاں ءُ سول سوسائٹی ءِ نمائندگان نندانکجاہ ءَ شتگ اَنت ءُ کھول ءَ چہ یکجاھی درشان کتگ-
نندانک ءَ نشتگیں زھرشانی کنوکانی گوشگ اِنت:
“ما گوستگیں دوازدہ روچاں چہ پاکستانی بُنجاھی شھر ءَ انساپ، پلگاری ءُ بُنکی انسانی ھکانی لوٹ ھست اَنت، بلے ما یکشل ءَ تُرسینگ، بھتام ءُ سسّائی زور ءِ آماچ ایں- چیریں ادارھانی کارندھاں اِھوالکار ءُ انتزامیہ ءِ دروشم ءَ اَتکگ ءُ مارا تُرسینگ ءَ اَنت-“
زھرشانی کنوکاں دیمتر ءَ گْوشتگ :
“ریاست ءَ مئے ورنایانی تیرسُپتگیں لاشانی چگل دیگ، مئے اُمیتاں بیگواہ کنگ، مئے تواراں ایرموش کنگ، ءُ مئے وجود سر ءَ دستیگ کنگ جُھد کتگ، بلے راجدپتر گواہ اِنت کہ بلوچ ناں بے سوب کتگ نانکہ بے توار کُت کتگ-“
“ما مرچی یکرندے پد ءَ یات دے ایں : تو پیسر ءَ ھم رد بیتگ ئے ءُ مرچی ھم رد ئے- ما زور ءَ چہ نہ تُرس ایں، ما چست بہ ایں، ما کریمہ، ماہ رنگ، سمی، سائرہ، شاہ جی، بیبرگ، ماما غفار، بیبو ءُ گلزادی جوڑ بہ ایں- ما زُلم ءَ را اوپار نہ کن ایں، ھو ما زوراکیانی باگی ایں-
زانگ بہ بیت کہ بلوچ زھرشانی کنوکاں ھکومت ءِ دیم ءَ دو بُنکی لوٹ ایر کتگ اَنت-
بلوچ یکجھتی کمیٹی ءِ سروکانی سر ءَ ھستیں دروگیں ایف آئی آرانی ھلاس کنگ ءُ آیاں زوت یل کنگ اِنت- بلوچستان ءَ زورانسری آوار جنی ءِ ھلاسی ءُ سرجمیں بیگواھیں مردمانی یل کنائینگ، گُڈی ءَ زھرشانی کنوکاں میان اُستمانی انسانی ھکانی گلاں ءُ رسانکدری مردماں چہ دزبندی کتگ کہ آ اے سنگین ءِ انسانی جیڑہ ءِ سر ءَ گامگیج بزور اِیت ءُ بلوچ زھرشانی ءِ بُنکی انسانی ھکاں دیگ ءِ کرد ءَ پیلو بہ کن اَنت-