چہ بلوچ اسٹوڈنٹس ایکشن کمیٹی ءِ نیمگ ءَ کیچ ءِ دمگ بلیدہ ءَ دو روچی فیسٹیولے بلیدہ ءَ زانشتی مراگش برجم دارگ بیتگ۔
شنگ بیتگیں جار ءَ گوشگ بیتگ دو روچی زانشتی مراگش ءِ جتائیں زانشتی ءُ وانگی بھر چوشکہ گُشتانک، پینل تران،گیدی کسہ ءُ نازینک، چاچ، بتل ءُ راجدپتری چکاس، ھامین ءِ پجار، ھالو، لیب لچہ، بلوچی لیب ءُ گوازی، کسمانک ءُ ڈائلوگ، کیرئیر کونسلنگ، شئیر ءُ شائری ءُ ساز ءُ زیملی بھر ءَ ھوار سائنس، دود ءُ ربیدگی، آرٹ ءُ کتاب اسٹال ھم اڈ دیگ بیتگ اَنت۔
شنگ بیتگیں جارانک ءِ رد ءَ مراگش ءِ بندات چہ بلوچ راجی سوت ءَ کنگ بوت، چہ آئی ءَ پد مراگش ءِ ایدگہ بھر جنزینگ بیتگ اَنت کہ آیانی تہ ءَ بلوچ ءِ وانگی نزام ءِ سر ءَ پینل تران ءُ بلوچ ءِ مئاشی نزام ءِ سر ءَ ڈبیٹ تران، ھامین ءِ پجار، سائنس ءُ کیرئیر کونسلنگ ءِ سر ءَ گُشتانک، گیدی کسہ ءُ نازینک، چاچ ءُ بلوچ راجدپتر ءِ سر ءَ چکاس(قوئز)، زھگانی لیب لچہ، کسمانک ءُ گُشتانک، سائنس پروجکٹانی درنگازی، ادارہ ءِ کتاب گام ءُ کمپیوٹر ءِ پجار ءِ درنگازی، زھگانی دوچاپی، وانگجاھانی پچیں مائک سیشن کہ آئی ءِ تہ ءَ جتائیں وانگجاھانی نودربراں بھر زرتگ، ایشاں ھوار دگہ بلوچی لیب ءُ گوازی کہ آیانی تہ ءَ ورّی، نوہ گَڈگی، ھشت چوکی، ٹِلاں گوازی ءُ پنچُکی ھوار بیتگ اَنت کہ زھگ ءُ ورنایاں بھر زُرتگ ءُ بلوچ ءِ دود ءُ ربیدگی لیب کُتگ اَنت۔ مراگش ءَ جتائیں اسٹال اڈ دیگ بیتگ اَنت کہ ایشانی تہ ءَ آرٹ اسٹال، سائنس پروجکٹانی اسٹال، بلوچ دود ءُ ربیدگی اسٹال ءُ بلوچستان کتاب کاروان ءِ کتاب اسٹال ھوار بیتگ اَنت۔
شنگ بیتگیں جار ءَ گوشگ بیتگ مراگش ءَ بساک ءِ بنجاھی سنگت اُزیر بلوچ ءُ بالاچ بلوچ ءَ ھوار بلیدہ ءِ اُستاد، سیاسی ءُ لبزانکی مردم ھوار بیتگ اَنت۔
بساک ءَ گوشتگ مراگش ءَ بساک ءِ بنجاھی سنگتاں تران کنان ءَ گوشتگ کہ ادارہ ءِ مدام جھد اِنت کہ آ بلوچستان ءِ ھمک ھَند ءُ میتگاں ھمے ڈولیں پُرمڑاھیں زانشتی مراگش اڈ بہ دنت ءُ یک انچیں زانشتی ماھولے ودی بہ کنت کہ چہ آئی ءَ بلوچ ءِ ھستیں ءُ آیوکیں پدریچ سان بہ زیر اَنت ءُ وانگ ءُ زانگ ءَ گوں ھمگرنچ بیان ءَ وتی بودشتاں بہ تراش اَنت ءُ راجی زمہ واریاں پیلو کنان ءَ بلوچ چاگرد ءَ شئور ءُ زانشتی تک ءَ ناں تھنا با سما بہ کن اَنت بلکیں دیمروی دیان ءَ یک مھکمیں منزلے ءَ سر بہ کن اَنت۔ بساک بلوچ ورنا ءُ نودربرانی ھما راجی درسگاہ اِنت کہ آئی ءَ چہ زانتکار ءُ بودناکیں ورنا ودی بنت ءُ بلوچ چاگرد ءَ وتی راجی بھرشتاں دیان ءَ راج ءَ سوبین کن اَنت۔
آئی ءَ گوشتگ مراگش ءَ اتکگیں گُشتانکاراں جتائیں زانشتی، سیاسی، المی ءُ لبزانکی سرھالانی سر ءَ تران کنان ءَ درائینت بلوچستان ءِ ایدگہ دمگاں ھوار بلیدہ ءَ ھم چہ بلوچ نودربر، استاد ءُ زانتکارانی جھد ءِ برورد ءَ پہ بلوچ چاگرد ءَ رُژنا پگریں راجی جھدے گندگ بیت کہ ایشی ءِ آسر ءَ چاگرد ءِ تہ ءَ زانشتی سرپدی ءُ راجی سِنچ ءُ سما ودی بیتگ۔ ھمے پیم بساک ءِ اے زانشتی مراگش آئی ءِ اوگام “جھد پہ زانشت ءُ یکمُشتی ءَ” ءِ املی اکس اِنت کہ کُل استاد ءُ نودربر اتکگ ءُ یکمُشت اَنت ءُ پہ زانت ءُ زانشت ءَ جھد کنگ ءَ اَنت۔ ھمے مئے راج ءِ ورنایانی جھد ءِ برورد اِنت کہ آئی ءَ چہ مئے چاگرد ءِ پرْشتگیں بازیں بھرے نزارگ بیتگ ءُ یکجاہ کنگ بیتگ پہ راجی جوڈشت ءَ کاروان جُنزان اِنت۔
شنگ بیتگیں جار ءَ گوشگ بیتگ مراگش ءِ سرجمیں بھراں پد سوگاتی بھر ءِ تہ ءَ مراگش ءِ جتاجتائیں بھراں بھر زُرتگیں زھگ ءُ ورنایاں ھوار وانگجاھانی اُستاداں سوگات دیگ بوت۔ آئی ءَ پد ساز ءُ زیملی بھر ءَ بلوچی کلاسیکی زیمر ءَ ھوار امتیاز بلوچ، حمید بلوچ ءُ وھاب بلوچ ءَ گوں وتی وشیں توار ءَ سوت الھان کُت۔ مراگش ءَ جتائیں پِڑانی مردم اتکگ ءُ مزنیں کچے ءَ بھر اِش زُرتگ۔
ما بلیدہ ءِ سرجمیں وانگی ادارھانی منتوار ایں کہ آیاں اے مراگش ءِ سوبین کنگ ءَ گچینیں کردارے پیلو کُت ھاس ھائی اسکول میناز بلیدہ، سنج اسکول میناز، گام اسکول الندور، مھلب اسکول الندور، کلکشان اسکول الندور، گُلبانک اسکول بٹ، رُژن اسکول میناز، تاھیر کمپیوٹر سنٹر بٹ کور ءِ پشت، ساچ اسکول ءُ راھشون اسکول ءِ کُلیں سروک، استاد ءُ نودربرانی کہ آیانی بھر زیرگ مئے واستہ مزنیں سکینے اَت ءُ چہ اے تپاکی ءَ بلوچ چاگرد ءَ شئعوری ءُ زانشتی پگر ءِ تالان کنگ ءَ گیش آسانی کیت ءُ پہ ھستیں پدریچ ءَ رُژنائیں اُمیتے سرا بیت-
گڈسر ءَ گوشگ بیتگ مراگش ءِ سرجمیں بھرانی یک یک ءَ سوبمندی ءَ گوں برجم دارگ ءَ پد دیوان دومی روچ ءَ آسر کنگ بیتگ۔