بلوچ راجی مُچی ءَ یک سالے سرجم بوگی اِنت۔ اے راجی مُچّانکی یک سیاسی مچانک ءِ نہ اَت بلکیں اے نوں بلوچ راجی مڈی ءِ سورت ءَ یہ سر کشّ اِتگ۔ راجی مُچی ءَ بلوچ راج ءَ نہ بلکیں یک یکجاھی پجّار داب ءَ یکجاہ کُتگ بلکیں کو نہ اے مچانک ءَ اَملی ھساب ءَ اے ھم تچک کُتگ کہ راجی یکجھتی ءُ راجی تاکت ءِ اسل زور اِنت۔ زور ءُ زوراکی ءِ سر ءَریاستی نزام ءَ ھلاس کنگ ھم ممکن اِنت۔
اے مچانک ءَ ھوار بوگ ءِ واستا ھزاراں بلوچاں دراج ءُ پریشانی ءِ سپر گوازیتگ، تلار داں گوادر ءَ رستگ ءُ راجی یکجاھی ءِ امل ءِ درگت ءَ پیش کُتگ۔ اے ساھت ءَ مئے راجی یکجاھی، ساسی سما ءُ گھگیری ئیں جزبگ ءِ بُرزتریں درور پیش داشتگ۔ راجی مُچی ھما بے کسانی شھیدانی ھوناں چِہ رژنائی تالان بوتگ آیانی کُربانیاں ھزاراں بلوچانی سِتکانی سر ءَ یکجاہ کُتگ اَنت کہ آ ھر ھما تاکت نہ منّگ بنت کہ راجی زندگی ءُ وشھالی واستا ھترہ اَنت۔
اے مچانک ءَ راجمانی بھر ءُ بانگ ءُ ھستانک نہ منّ اِتگ ءُ راجی سما ءَ را ھر لوگ ءُ گدان ءَ داں رسینتگ ءُ باور کنائینتگ کہ بس راجی یکجاھی ءِ پُشدر ءَ ما وتی راجی زندمان ءُ پجّار ءِ زمانت ءَ گپت کُت کنیں۔
ھمے سما ءُ گھگیری شھزانتی ءَ گیش ودینگ ءِ ھاتر ءَ، بلوچ یکجھتی کمیٹی راجی مُچی ءِ یک سالے سرجم ءِ ھاتر ءَ جتائیں املی، اِلمی، سیاسی ءُ راجی مراگش اڈ دے اِیں، چمیشی ءَ چہ دزنبشت بوتگیں چست ءُ ایر ھوار اَنت:
۱-بلوچ راجی یکجھتی، انوگیں سیاسی جاور ءُ گھگیری راجدپتر ءِ سر ءَ املی ءُ سیاسی نبشتانکانی سر ءَ ھوار کنگ بنت۔
۲-بلوچستان ءِ کُنڈ کُنڈ ءَ “بلوچ راجی مُچی: راجی یکجھتی ءُ گھگیری شھزانتی” ءِ سرھال ءَ چہ اِلمی رھبنداں بندات کنگ بنت انت۔
۳-سرجمیں بلوچستان سمائی ودینگ ءِ ھاتر ءَ پمپلٹ بھر ءُ بانگ کنگ بنت اِنت۔
۴- ماں چاگردی رسانکدر ءَ آگاھی درشانداب جوڑ کنگ بنت اِنت۔
۵- شھیدانی مانشجاھاں چادر مانپوشگ بنت انت۔
گل درائیں دمگاں ءُ ھنکیناں گْوشگ بیت کہ راجی مُچی ءِ یک سالے سرجم بوگ ءِ موہ ءِ سر ءَ مراگشانی یکشل ءَ تیاریاں برجاہ دارگ بندات بکن اِت۔
ما چہ بلوچ راج ءَ دزبندی کنیں کہ وتی دمگاں بوتگیں اِلمی مراگشاں گوں پُر زوراں ھوار بکن اَنت، شھیدانی مانشانی سر ءَ چادر مانپوشگ چست ءُ ایر ھوار اَنت، ءُ چاگردی رسانکدر ءَ آگاھی درشانداب ءِ کاراں وتی بھرشت ءَ ھوار بکن اَنت۔