بلوچ یکججتی کمیٹی ءَ یک بیانے ءِ تہ ءَ گشتگ گوستگیں روچ ءَ 29 جون ءَ پنجگور ءَ دہ سال ءَ زورانسری ءَ بیگواھی ءِ آماچیں زھیر احمد ءِ بچ زیشان زھیر ءَ ءُ بلوچ یکجھتی کمیٹی ءِ آرگنائزنگ کمیٹی ءِ باسک چہ پاکستان ءِ پوج ءِ دمگی ملیشیا، بدنامیں ڈیتھ اسکواڈ ءِ نام ءَ زانگ بیت کہ آیاں فٹبال چوک ءَ آوار جتگ۔
آئی ءَ گْوشتگ زیشان ءِ زوراکیں بیگواھی ءَ چہ ھما دمان ءَ پنجگور ءَ کھول ءُ لس مھلوک ءِ نیمگ ءَ دھرنا کنگ بیتگ کہ داں شپ ءَ دھرنا برجاہ بوتگ۔ مرچی 30 جون ءَ سھب ءِ 9 ءَ آئی ءِ لوگ ءِ مردماں زیشان ءِ ٹپ ءُ ٹوریں لاش رس اتگ۔
بیست ءُ یک سالی ئیں ذیشان زھیر یک جاڑیگیں سیاسی ءُ انسانی ھکانی جھدکارے بیتگ کہ آ گوں وتی پت زہیر احمد ءَ ھوار سرجمیں بلوچستان ءَ زورانسری ءَ بیگواہ کنگ ءُ بلوچ نسل کشی ءِ ھلاپ ءَ مدام وتی توار ءَ چست کنگ ءَ بیتگ۔ آئی ءَ ریاستی سرکوبی، زوراکی ءُ غیر عدالت ءِ کشگ ءِ ھلاپ ءَ زانشتی سیاسی لیکہ زرتگ۔
جارکش ءَ گوشت کہ زیشان زھیر ءِ درکانودی کوش بلوچستان ءَ ھما بلوچ نسل کشی ءُ ریاستی زُلمانی برجاھی انت کہ گوستگیں ھپت دھکاں چہ پاکستانی لشکر ءُ پرائیویٹ ملیشیا ءِ دست ءَ بیگ ءَ انت۔ بلوچستان ءَ انوگیں وھد ءَ جنگل ءِ کانون ءِ سر ءَ زور دیگ بوھگ ءَ اِنت کہ اود ءَ روچ پہ روچ بلوچ شھری زوراکی ءَ بیگواہ کنگ ءُ آھانی ٹپ ءُ ٹوریں لاش دزکپگ ءَ اَنت۔ ریاستی زلم ءُ زوراکی سر ءَ سرگوستگ ءُ کانون ھچ رنگ ءَ دیم ءَ گندگ نہ بیت۔
آئی ءَ دیمترا گوشت کہ بلوچ یکجھتی کمیٹی شھید زیشان زھیر ءِ درکانودی کوش ءِ ھلاپ ءَ سرجمیں بلوچستان ءَ زھرشانی ءُ مراگشانی برجم دارگ ءِ جار ءَ جنت۔ چہ درستیں زوناں لوٹ کنگ بیت کہ آ زوت زھرشانی ءِ پروگرام ءُ یاتگاری مراگشانی تیاری ءَ بندات بہ کن اَنت۔ باندا سوشل میڈیا ءِ سر ءَ ھم سرپدی مھم ءِ بندات کنگ بیت۔