آجوئی ءِ توار سمّو
نبشتہ کار: وسیمہ بلوچ
دی بلوچستان پوسٹ
جند ندری سمیہ بلوچ یک دلیریں بلوچ زالبولے اَت، کہ آئی ءَ وتی ساہ ءُ سر پہ وتی وتن بلوچستان ءِ آجوئی ءِ ھاتر ءَ کربان کُت انت۔۔ سمیہ یک وانندہ ءُ زانتکارے اَت سمیہ بلوچ ءَ وتی راج ءِ ھک ءُ آجوئی ءِ ھاتر ءَ وت ءَ کُربان کُت آ مدام وتی راج ءِ وپادار بوتگ ءُ گُڈی ءَ آئی ءَ وتی ساہ پہ بلوچستان ءِ آجوئی ءِ ھاتر ءَ نَدْر کُت۔
آئی ءِ شھادت بلوچ راج ءِ راجدپتر ءِ تہ ءَ یک درپشناکیں استالے یے درور ءَ انت چہ ایشی ءَ پدّر بیت کہ زالبول پہ وتی ڈیھ ءَ ھچ وڑیں کربانی دیگ ءَ چک ءُ پد نہ بنت۔۔سمیہ پہ بلوچ ءِ نوکیں پدریچ ءَ ھمت ءُ ندر بوگ ءِ مزنیں شانے زانگ بیت۔
سمیہ بلوچ ءَ زلم ءُ زوراکی ءُ زُلم ءِ ھلاپ ءَ جنگ کتگ آئی ءِ جیڑگ ایش ات کہ مارا جنگ کنگی انت وتی جھد ءِ تہ ءَ بدلی آرگی انت آئی ءَ بس گپ نہ جتگ ات میدان ءَ دراتکگ ات۔
گُڈسر ءَ آئی ءَ پہ بلوچستان ءَ وتی سر ھم ندر کُت آئی ءِ شھادت ءَ بازیں مردم چہ واب ءَ پاد اتک اَنت ءُ پہ وتی ڈیھ ءَ چیزے کنگ ءِ ھمت دات اَنت مروچی ھم آ ھاسیں رنگ ءَ پہ بلوچ زالبولاں یک مسالے زانگ بیت کہ آ ھم ھر وڑ ءَ دیم ءَ شُت کن اَنت۔
من پدائی سمیہ بلوچ ءَ نان ایوک ءَ سنگتے یے بستار ءَ زانتگ بلکیں یک رھشونے رژنائی یے ءُ مسالے یے بستار ءَ زانتگ ما مُدام یکجاہ اِتیں کندگ ءُ گپ ءَ اِتیں وڑ وڑیں واب گندگ ءَ اِتیں بلے آئی ءَ مدام گُشت مارا چیزے کنگی انت کہ اگاں ما بے توار بہ بئیں گڑا مئے باندات ءِ آکبت تباھی ءُ بربادی ءِ نیمگ ءَ روت۔
سمیہ ءَ بس گپ نہ کُت آئی ءَ وتی گپانی سر ءَ امل ھم کُت آئی ءَ وتی وتن راستی ءَ دوست بوتگ اَت ءُ آئی ءِ دل ءِ واھگ اَت کہ ھر بلوچ زھگ گوں شرپ ءُ زانت ءُ آجوئی ءَ زندگ بہ بیت۔
آئی ءِ شھیدی پہ من سک ءَ تورناک اَت بلے من ءَ نزور ئِے نہ کُت بلکیں من ءَ گیشتر مھکم ئِے کُت آ انگت منی دل ءَ زندگ اِنت ھر دمان ءَ کہ من پہ راستی ءَ گپ جناں وھدے کہ من وتی زمین ءِ ھاتر ءَ جیڑاں منی سنگت سمیہ تو شتگ ئے بلے تئی گپ تئی کندگ ءُ تئی کربانی مدام منی ھمراہ اَنت-
ما یکجاہ آجو ءُ آبادیں بلوچستان ءِ واب دیستگ اَت سمیہ ھما وابانی راست کنگ ءِ ھاتر ءَ دیم ءَ شت ءُ پد ءَ واتر نہ بوت بلے راستی ھمیش اِنت آ منی ھیال ءُ جیڑگانی تہ ءَ زندگ انت ھر دمان ءَ کہ من وتی راج ءِ بابت ءَ جیڑاں آ منی ھمراہ اِنت۔
وھدے کہ من راستی ءُ انساپ ءِ ھاتر ءَ اوشتاں سمیہ من ءَ تئی سک یات کیت بلے تئی یات پہ من سکین انت تی یات مدام منی دل ءَ زندگ اَنت۔
سمیہ ءَ ھر وھد ءَ گُشت کہ ما بلوچ جنک ھرچی کُت کن اِیں ءُ آئی ءِ دل ءَ لوٹ اِت کہ بلوچ جنک چہ وتی بندیں کوٹیاں در بہ کپ اَنت کتاباں دست بہ گِر اَنت وتی توار ءَ بُرز بہ کن اَنت ءُ دگنیا ءَ پیش بہ دار اَنت کہ ما چہ کس ءَ کمتر نہ ایں۔ آئی ءِ گپ آئی ءِ ھمت منی دل ءَ نبشتہ اَنت ما یکجاہ زند گوازینگ ءِ واب دیستگ ات بلے آئی ءَ وتی واب راست کُت انت ءُ شُت ءُ من ءَ آئی ءَ زند گوازینگ ءِ رھبند وانینت انت۔
مروچی ھم اگاں من وھدے نزور باں گُڑا سمیہ ءِ توار منی گوشاں کپ ایت ءُ من مھکم باں ءُ من پد ءَ گوں وتی ھمت ءَ اوشتاں۔ سمیہ تو چہ مئے میان ءَ شتگ ئے بلے تی ھیال ءُ تئی دوستی پہ ابد منی ھمراھی ءَ زندگ اَنت-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-