پاکستانی پوج ءِ بندیگ جاہ ءَ آجو بؤگ ءَ پد ورنایے بیران بوتگ ۔
کھول ءِ رِد ءَ شاہ زیب بندیگی ءِ وھد ءَ سک باز لٹ ءُ کٹ کنگ بوتگ ، آئی ھمنچو درد پر بوتگ کہ یل بؤگ ءَ باز دیر نگوستگ کہ وتی ساہ ءِ داتگ ۔
شاہ زیب اھمد ء شریپ اھمد شال کلی کمبرانی نندوک ایں کہ مزنیں ائید ءِ چارمی روچ ءَ وتی دگہ دو ھمساھگانی ھمرائی ءَ منگچر ڈیم ءَ پکنک ءَ شتگ بوتگ انت ۔ واتری ءِ وھد ءَ شپ ءَ آیانی پرپٹ ھراب بوتگ ، کہ چہ ھمودا ھر سَے ایں ورنا پوج ءَ آوار جتگ ءُ بیگواہ کتگ انت ۔
کھول ءِ گوشگ انت کہ بندیگی ءِ وھد ءَ ورنا سک باز لٹ شاپ کنگ بوتگ۔ شاھزیب ءِ جان ءَ سوچگ ءِ نشان ، پرشتگیں دست ، کش اتگیں ناکن ءُ سھر تر اِتگیں دیم ھمے شاھدی ءَ دیگ ءَ بوتگ کہ آ سک باز ازیت دیگ بوتگ ۔
آیاں گوشتگ کہ پلاسٹک شیرگ کنگ بوتگ ءُ آئی جان ءِ سرا پِٹ ایں اتگ انت ، لھڑ داتگیں آپ مانریتکگ ءُ ورگ ءَ بس کیٹگ دیگ بوتگ ۔
شاھزیب یل بوگ ءَ پد ھما دمان ءَ سنگتے ءِ ھمراھی ءَ نادراھجاہ ءَ برگ بوتگ ، بلے پدا ھم آئی ءَ ٹپانی درد نہ سگ اِتگ ءُ بیران بوتگ ۔
کھول ءِ رِد ءَ شاھزیب ءَ مرگ ءِ وھد ءَ ھمے گوشتگ کہ ” جنگ ءِ وھد ءَ کاپر ھم مردمانی گوم ءَ چوش نہ کن انت ”
آوار جنگ بوتگیں سَے این ورنایانی تہ ءَ یکے ھنگت بیگواہ ایں کہ آئی ءِ درگت ءَ ھچ وڈیں ھال نیست وھدیکہ دومی ءِ باروا ھم ھمے گوشگ بوگ ءَ انت کہ آئی ءِ ھم جاور نگیگ انت ۔
زانگ بہ بیت ھستیں وھد ءَ بلوچستان ءِ تہ ءَ زورانسری آوار جنی ءُ بندیگی ءِ وھد ءَ بیران بوتگیں مردمانی کچ گیش بوتگ انت ۔ مشکے ، کیچ ءُ گوادر ءَ ھوار ایندگہ ھند ءُ دمگاں بازیں مردمے چہ لٹ ءُ شاپاں بیران بوتگ انت کہ اشی ءِ سرا انسانی ھکانی ادارھاں ھم دلپدردی درشان اِتگ ۔