کیچ ءِ دمگ تمپ ءِ میتگ کوھاڈ ءَ دمگی زالبولاں سرکاری پلامرزی ھستیں گل ءِ کارندہ گوں سلاھاں دزگیر کتگ انت۔
چاگردی ترامجاھاں شنگ بوھوکیں ویڈیو ءِ تہ ءَ سئے مردم گندگ بنت کہ آ وتی دستاں گوں مھلوک ءِ دیم ءَ بندگ ءَ اَنت کہ آھانی سر ءَ تمپ کوھاڈ ءِ ورنا تنویز نذر ءِ کوش ءِ کوشست ءِ بھتام اِنت۔
اے سئیں مردمانی سر ءَ لٹ ءُ کٹانی ندارگ ھم ویڈیو ءِ تہ ءَ گندگ بنت۔ ایشانی تہ ءَ یکے گپ جنان ءَ پیش دارگ بیت ۔ آئی ءِ گشگ ءِ رد ءَ آ چہ ناصیر آباد ءَ تمپ ءِ میتگ کوھاڈ ءَ اتکگ ءُ تنویز نزر ءِ لوگ ءَ سر بوھگ ءَ آئی ءَ گوانک جتگ۔ بلے دمگ ءِ جنیناں اے سئیں شکی ئیں مردم دیستگ ءُ دزگیر کتگ اَنت کہ رند ءَ آیاں وتی شوربندیانی سر ءَ من اتگ-
چہ دمگی مردمانی رد ءَ پیسر ءَ کوھاڈ ءِ میتگ ءَ ناشناسیں ارشکارانی دست ءَ ھپت مردم تیرگواری ءَ بیران بوتگ اَنت ءُ اے گپ ءِ سر ءَ شک بوگ ءَ اِنت کہ اے سئیں ھمے گل ءِ بھر اَنت کہ دمگی ءُ سیاسی گل ایشی ”ڈیتھ اسکواڈ “ ءِ نام ءَ زان اَنت۔
دمگی مردمانی گشگ اِنت کہ اے سلاہ بندیں گل پاکستانی لشکر ءُ سرکاری ادارھانی چیردستی ءَ ھست انت ءُ اے دمگ ءَ شیتانی، نشانگی کشگ ءُ دگہ جرماں ھوار اَنت۔