بلوچستان ءِ دمگ کیچ ءِ بُنجاھی شھر تربت ءَ زورانسری آوار جنی ءِ ھلاپ ءَ کھول ءِ نندانک برجاہ- یاور حبیب ء حبیب بلوچ، شانزدہ جون ءِ نیمروچ وھد ءَ تربت ھائی کورٹ ڈن ءَ ناشناسیں مردماں زورانسری آوار جتگ ءُ یک گاڑی یے تہ ءَ مان کتگ برتگ – وئیل ءَ پد کھول ءُ دمگ مردماں شاپک ءِ ھند سر ءَ سی پیک شھدگ بند کتگ زھرشانی کنان ءَ نندانک داتگ-
چمّگدانی ءَ اسرمندیں کھول رِد ءَ، یاور حبیب اے روچ ءَ وتی پت ھمراھی ءَ آمیدگیس ءَ پیشی ءِ واستا ساڑی بیتگ، وھدے آ آمیدگس ءَ چہ ڈن اتکگ لھتے ناشناسیں مردماں آ زورانسری یک گاڑی تہ ءَ نادینتگ ءَ وتی ھمراھی ءَ برتگ- یاور ءِ کھول ءَ گْوشتگ کہ اے اولی رند نہ اِنت کہ آ بیگواہ کتگ، یکرندے پیسر ءَ ھم آوار جنی ءِ نشانگ کنگ بیتگ-
زھرشانی کنوکاں لوٹ کتگ کہ یاور حبیب ءَ زوت یل کنگ ءُ دیم ءَ بیار اِنت ءُ اے وڑیں وئیلانی گر ءُ دار واستا تُرندیں گامگیجے زورگ بہ بیت-
سی پیک شھدگ بندی ءِ سبب ءَ گاڑیانی روگ آیگ بند بیتگ، زھرشانی کنوکانی گوشگ اِنت کہ زورانسری آوار جنی ءِ درچ ناں تھنا انسانی ھکانی ھلاپ ورزی اِنت، ھکومت ءُ انسانی ھکانی گل اے درگت ءَ سنجیدگی ءَ چہ گامگیج بزور اِیت حبیب ءَ ھوار سرجمیں بیگواھیں مردماں یل بہ کن اِت-
تنی وھدے دمگی انتزامیہ نیمگ ءَ چہ اے درگت ءَ ھچ وڑیں درشان دیم ءَ نیتکگ-