چہ بلوچ اسٹوڈنٹس ایکشن کمیٹی ءِ نیمگ ءَ نال ءِ دمگ گریشگ ءَ وانگی ءُ لبزانکی مراگشے نمیرانیں سنگت شعیب بلوچ ءُ ماسٹر وھاب ءِ یات ءَ برجم دارگ بیتگ۔ مراگش جتاجتائیں بھرانی تہ ءَ بھر بوتگ کہ آھانی تہ ءَ گُشتانک، پینل تران، کسمانک، ڈاکیومنٹری، زھگانی تران ءُ باوست، گام وانگ، پٹ ءُ پولی تاکانی وانگ، کتاب میڑہ ءَ ھوار شَیر ءُ شائری ہوار بیتگ اَنت۔
شنگ بیتگیں درشان ءَ گوشگ بیتگ مراگش ءَ بنجاھی سنگت مھمد بلوچ، جویریہ بلوچ ءُ فھد بلوچ ساڑی بیتگ اَنت۔مراگش ءِ بندات چہ بلوچ راجی سوت ءَ گوں کنگ بیتگ۔
مراگش ءَ ترانکاراں تران کنان ءَ گوشت کہ بلوچ کہ مدام یک ایردستیں زند ءِ گوازینگ ءَ اِنت آئی تہ ءَ بازیں وتسریں گپ ءُ باوستاں جاہ کُرتگ، ھمے گپ ءُ باوستاں چہ مئے راج ءِ بازیں مردمے سانمند بوان ءَ جتا جتائیں نادراھیانی آماچ انت۔ بزانکہ مئے راج ءِ تہ ءَ ھما مردم کہ اِستانی بیانیہ ءُ آئی ءِ گپ ءُ پالیسیاں وتی نازانتی ءِ بنیات ءَ وڑے نہ وڑے ءَ دیم ءَ برگ ءُ مھکم کنگ ءَ انت بزانکہ ھمے مردم بلوچ ءِ ایردستی ءِ دراجکشی ءَ ھوار انت۔ استان ءَ مارا گُشتگ کہ شما نا وانندگ ات نابلد اِت گڑا ما ھمے گپّاں راستی سرپد بوان ءَ آئی داتگیں بیانیہ زُرتگ ءُ گشتگ کہ وانگی اِنت۔ بلئے اے گپ نہ مارِتگ کہ چے وانگی انت ءُ چوں وانگی اِنت۔ یاکہ مئے مردم ھمے اُمیت ءَ وتی زھگاں وانین اَنت کہ باندا روچ مئے بچ مئے کمک بنت، بلئے بژن ھمدا بیت کہ مئے ورنا کہ وان انت گڑا وتی پجار، زبان، راج ءُ وتی مھلوک ءَ بے ھیال کن اَنت۔ نہ تھنا بے ھیال کن اَنت بلکیں وت ءَ ھمے زمہ واریاں چہ دور دارنت ءُ وتی زاتی اَنا ءُ سیتاں گوں ھمگرنچ بنت، ھمے چیز استانی لوٹاں سرجم کنگ ءِ وسیلہ جوڑ بنت۔ مئے راج ءِ ورنا ءُ ایدگہ مھلوک ءَ سرپد بوگ لوٹ ایت کہ مئے راجی زمہ واری، راجی لوٹ، سیاسی زرورت چے اَنت ءُ مارا چے کنگ لوٹ ایت-
مراگش ءَ دیمترا گپ کنان ءَ گشت اش کہ لھتے مردم کہ مرگ ءَ پد نازینگ بنت گڑا آیاں وتی زند گوں زات ءَ بندوک نہ کرتگ بگندئے راجی لوٹانی ھساب ءَ وتی زند اِش گوازینگ ءِ یک جھدے کُرتگ، مروچی مئے دیوان ءُ ڈسکیشنانی بھر اَنت۔
دیوان ءِ دیمتری بھر پینل ڈسکشن اَت کہ اے جتا جتائیں سرھالانی سر ءَ بھر اَت۔ پینل ڈسکشن ءِ مھماندار نور بلوچ بوتگ، مھمان نادر بلوچ، گوہرام بلوچ ءُ فوزیہ بلوچ بوتگ اَنت۔ سنگتاں نودربر سیاست، آئی ارزشت ءُ لوٹ ءُ مروچیگیں وھد ءَ نودربر سیاست، میڈیا ءِ ارزشت ءُ مروچیگیں لوٹاں گوں ھوار پروپیگنڈا، بیانیہ ءُ ڈسکورس ءِ سر ءَ گپ ءُ تران کُت۔ ایشاں ابید لس مھلوک ءِ سیاست ءُ سیاسی جاور ھالاں گوں ھوار ھوار استان ءِ کریک ڈاؤن، سیاسی پروگرامانی سر ءَ بندش ءُ ایدگہ جیڑھانی سر ءَ سنگتاں جوانیں وڑے ءَ گپ ءُ تران کرتگ۔
مراگش ءِ جتا جتائیں بھر یک یک ءَ سوبمندی ءَ گوں برجم دارگ بیت اَنت۔ گڈسری بھر سوگاتی بھر اَت کہ دیوان ءِ تہ ءَ ساڑی ئیں مھمان ءُ ایدگہ بھر زرتگیں مردمان ءَ کتاب سوگات کنگ بوت۔ مراگش ءِ تہ ءَ ھَندی نودربر، ورنا، استاد ءُ ایدگہ پِڑ ءِ مردماں بھر زُرتگ ءُ مراگش سوبمند کتگ۔