مستونگ ءُ کلات اُرشاں پاکستانی پوج ءِ شش کارندہ کُشتگ – بی ایل اے

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گْوشتگ مئے سرمچاراں مستونگ ءُ کلات ءَ دو جتاجتائیں اُرشاں زورگریں پوج نشانگ کتگ ءُ مزنیں کچے ءَ تاوان داتگ- اے کاروائیاں ریموٹ کنٹرول آئی ای ڈی ءُ تچکی ءَ سلاہ بندیں اُرش ھوار اَنت-

جارکش ءَ گْوشتگ بی ایل اے ءِ سرمچاراں گوستگیں شپ ءَ مستونگ ءِ دمگ اسپلنجی مَرو کنڈ ءِ ھند سر ءَ زورگریں پاکستانی پوج ءِ کاروان ھما وھد ءَ سنگر گپتگ ءُ نشانگ کتگ وھدے آ زوراکی ءِ نیئت ءَ دمگ ءَ پیشگامی کنگ ءَ بیتگ- سرمچاراں وتکاریں سلاھاں چہ اُرش کتگ زورگریں پوج ءِ سے کارندہ جاہ پہ جاھی مرتگ اَنت ءُ بازین ئِے ٹپی کتگ اَنت-

جارکش ءَ گْوشتگ بلوچ لبریشن آرمی ءِ سرمچاراں کلات ءِ دمگ جوھان ءَ مکی ءِ ھند سر ءَ زورگریں پاکستانی پوج ءِ بمب ڈسپوزل اسکواڈ ءِ پیادگ کارندہ ھما وھد ءَ ریموٹ کنٹرول آئی ای ڈی اُرش ءَ نشانگ کتگ وھدے آ کلیئرنس ءَ دلگوش بیتگ اَنت- تراک ءِ آسر ءَ زورگریں پوج ءِ دگہ سے کارندہ مرتگ اَنت ءُ یکے سک ٹپی بیتگ-

جارکش ءَ گْوشتگ بلوچ لبریشن آرمی اے اُرشانی زمہ واریاں منّ اِیت-