ایران ءُ اسرائیل ءِ نیام ءَ گیش بوھوکیں گِرّ ءُ چیل ءُ ایران ءِ تہ ءَ ایمنی ءِ ھترہ ءِ سبب ءَ رودراتکی ءُ مگربی بلوچستان ءِ نیام ءَ تجارتی کار سک باز تاوان داتگ اَنت۔
پاکستان ءِ چیر دستی ءَ بلوچستان ءِ ھندی انتظامیہ ءَ سیمسر ءِ سر ءَ چہ دیم ءَ گوزگ ءِ جاہ بند کتگ انت کہ ایشی ءِ سبب ءَ تربت ءِ ڈی بلوچ ءِ دمگ ءَ لس مھلوک ءُ سوداگراں زبردستیں زھرشانی کتگ ءُ راہ بند ءُ دھرنہ داتگ۔
زھرشانی کنوکیں مردمانی گشگ اِنت کہ سیمسری سوداگری ایشانی زند ءِ یکیں وسیلہ اِنت ءُ بندش ءَ چہ ھزاراں ھاندان بے روزگاری ءِ کش ءَ سر بوتگ اَنت۔
زھرشانی کنوکاں لوٹ کتگ کہ اے مرز زوت پچ کنگ بہ بیت دانکہ دمگی معیشت ءَ گیشیں تاوان مہ بیت۔
اے درگت ءَ پنجگور ءِ دمگ ءَ گوں ایران ءَ دراھیں پیادگیں سیمسر ءِ سر ءَ چہ دانو، چیداگی ءُ جیراک پروم ءَ ھوار پہ بے مھتلیں وھد ءَ بند کنگ بوتگ اَنت۔ دمگی انتظامیہ ءِ رد ءَ اے پیسلہ انوگیں سیکورٹی ءِ ھترھانی ھیال ءَ دارگ ءَ کنگ بوتگ۔
ایران ءِ نپت ءِ سر کنگ ءِ ھمراہی ءَ پیادگ ءِ سر ءَ سرجم ءَ بندش جنگ بوتگ۔ ڈپٹی کمشنر پنجگور ءِ گشگ انت کہ اے گامگیج ایران ءِ تہ ءَ بوت کنوکیں بے وسی ءِ رژنائی ءَ چست کنگ بوتگ انت۔
زانگ بہ بیت کہ ایران ھم اسرائیل ءِ زانتکاریں ادارہ موساد ءِ نیمگ ءَ ایرانی زانتکار، افسر ءُ آسراتیانی سر ءَ اُرش کنگ ءِ ھالانی پد ءَ جتا جتائیں احتیاطی گامگیج زورگ ءَ اِنت۔
اسرائیل ءَ دعویٰ کتگ کہ آئی ءِ انٹیلی جنس ادارہ موساد ءَ ایران ءِ تہ ءَ آپریشن کتگ ءُ ایشی ءَ پد ایران ءِ سرزمین ءِ سر ءَ سیکورٹی گیش کنگ بوتگ۔
اگرچہ ایران ءِ واکداراں انگت ءَ سیمسر بند کنگ ءِ بابت ءَ ھچ وڑیں سرکاری بیان نہ داتگ بوتگ بلے اسرائیل ءِ دعویٰ ءِ پد ءَ ایران ءِ تہ ءَ گاڑیانی سر ءَ سکیں پٹ ءُ پول کنگ بوگ ءَ اِنت۔
انتظامیہ ءَ چہ الس ءَ دزبندی کتگ کہ آ انوگیں نازرکیں جاور ھالانی تہ ءَ سرکاری ادارگانی گوم ءَ سرجمی ءَ کمک بہ کن اَنت ءُ بے وسی ءَ چہ رھادگ بوگ ءَ بہ رک اَنت وھدے کہ سیم سر ءِ بندش داں جاور ھال وتی جاہ ءَ واتر نہ بنت۔