ماه جبین دریگتیں فکشن ءِ کارستے بوتیں
نبشتہ کار: اُمیر بلوچ
دی بلوچستان پوسٹ
شائر ، ادیب ءُ نگدکارانی دیوان ءَ زندگی بس ٹریجڈی اِنت . ناول ءِ Theme ءَ بہ گر داں کارستانی ڈائیلاکانی سر ءَ ھبر اِنت، نبشتہ کار ءِ زبان، کسہ سازی ، منزر سازی ءُ هرچ تک ءُ پھنات ءَ ھبر ءُ هال بند نہ بیت . اے مئے دانشورانی زندگی اِنت ، برے میڈیا ءَ کمک ءُ برے ٹریجک گندگ ءَ کاینت. روسی لبزانک ءَ بہ گر داں پرنچ لبزانکی کارستانی ریس ءُ پریس کنگ ءَ اَنت. تاک ءُ مھتاک اَنت ، میڈیا ءَ نبشتانکے کیت ءُ پد ءَ دگہ یکے سر کش اِیت. کامیو ءِ Absurdism ءِ کامرزگ اِنت ، سارتر ءِ وجودیت اوں دیوانانی براه اِنت. اے سپر برجاه اِنت ، روان اِنت ، بس اهولانی دنیا اِنت، چہ هرچیز ءَ شُموشکار. بہ گُپت ءِ اروندهنتی رهو ءِ ” باید یک روچے ما چہ اے اهوالانی رَٹگ ءَ موکل بہ زوریں ءُ چماں پچ کنیں وتی کش ءُ کراں بچاریں ، سما بہ کنیں کہ چے بیگ اِنت” بلے بژن… ما دز گٹیں، ادب ءِ مردم ایں ، مئے جتائیں زندگی ءِ چارگ ءِ رھبند اِنت-
برے برے وَ مئے ادیبانی دنیا انچو tragic اِنت کہ ما هیران بہ ایں. اود ءَ آیاں یورپ ءِ میتهالوجیکل کارستانی گم گون اَنت. برے انچوش Fictional اَنت کہ شیکسفیئر ءِ کارست اوفیلیا ءِ مرگ ءَ موتک کار اَنت کہ پرچی آ کور ءِ تہ ءَ بُڑ اِت ءُ مُرت . ویکٹورین زمانگے تهامس ھارڈی ءِ کارست Tess مردینانی زوراکی ءِ آماچ بوت. اے پکشنل باوست ءُ یورپین کارستانی رومانٹسائز کنگ مئے دانشورانی هر روچیگیں کسہ اَنت بلے-
ماه جبین ، کارستے نہ اِنت بلکیں مئے کش ءَ ساه زوروکیں جنکے. آ واشک ءِ نندوک اِنت ، ریاستی لشکر ءَ زورآنسری آوار جتگ ءُ گوں وت برتگ. تنیگا آئی ءِ هچ اهوال نیست . چہ درستاں تورناکیں هبر ایش اِنت ، وتی مھلوک ئِے بے هیال اِنت کہ آئی ءِ گوهار ءِ گوجرنوالہ ءُ پِنڈی ءِ درآمدیں پنجاپیاں گوں وت بُرتگ. اے هاموشی مارا باندا اے موه ءَ نہ دنت کہ ما بہ گشیں ” ما لَجّیں گوهارانی ” بے تواری همک دمکاں ناچ کنان اِنت-
ءُ ! ماه جبین تو یورپی گدارے ءِ کارست بوتیں تہ تئی نام شال ءَ بہ گر داں پسنی ءَ همک دیوانانی تہ ءَ باوستانی بھر بوتگ اَت. بلے تو نودربرے ئے ، لوگ ءَ چہ اُمیتے کوپگاں کتگ شال ءِ ٹنٹیں دمکاں اتکگ ئے ءُ درآمداں ترا رُپت ءُ انگت ما چہ وت ءَ گیش نہ ایں دریگتیں تو چھر ءُشبینے بوتین ئے، دریگتیں تو لبزانکی وت ساچیں دبستانے بوتین ئے…. مارا پھل کن، راستی ءَ مئے شائر ءُ نبشتہ کار وتی چماں بند اَنت ، بلے فکشن ءَ انچو بیان کن اَنت گش ئے راستی اَنت. اے هیرانگی اَنت کہ ما فکشن ءَ راستی سرپد بنت ءُ راستی ءَ فکشن . Oliwer Crownwell ءِ چپ ءَ نبیس اتگیں شیر مارا دل ءَ یات اَنت بلے ماه جبین ءِ سر ءَ نبیسگ سیاست اِنت ، پد ءَ سیاست ءَ لبزانک ءَ گوں سیالی نیست ، پمیشکا ما دست ءِ نَد ءَ دور دے ایں-
ماه جبین مئے چمانی دیم ءَ گار اِنت. نا موتکے ، نا هالتاکے ناں کہ میڈیا ءَ دگہ رنج اتگیں نبشانکے ، بس وا تُرس ءِ دل ءَ مردماں داشتگیں . هچ نہ گواہ اِیت ، بس ندارگ کن اَنت، نو چہ راستی ءِ ندارگاں هم ما دمتوس ایں. ماه جبین تو شیرے بوتین ءُ همک دل دریکینتیں ، تو نبشتھے بوتین ئے اے هاموشی پروش داتگ اَت ، تو آزمانکے بوتین ئے ، تا مردماں پہ تو موتک آؤرتگ اَت . بلے بژن ، کس ماه جبین ءَ نبیسگ ءَ نہ اےنت پمیشکا روچ پہ روچ راستی چیر ترّان اِنت . چوش مہ بیت ، اے هاموشی کُل شھر ءَ بہ پتاہ اِیت. ماه جبین بگند ئے تو انو تھاریں کوٹیاں جیڑگ ءَ ئے ، من ءَ رند منی مھلوک چے جیڑ اِیت ، بلے ما سک دز گٹ ایں وتی زند ءِ کش ماں کشاں. کسے ءَ وتی AssigmenT کنگی اِنت ، کسے ءِ یدار بستگ سھب ءَ تیاب ءَ روگی اِنت ءُ کسے ءَ گاڑی تیل کنگی اَنت بارڈر ءَ سرکار ءَ پچ کتگ-
واشک داں چنت ءَ پہ تو پرسیگ بیت نزاناں _ بلے اے هاموشی ءِ توار ءَ پروش بیت ، اد ءَ کئی گِلہ ءَ کن ئے کہ زبان ءَ میار نیست۔ نبیسگی اِنت نا ایوک ءَ ما پاکستانی زوراکیاں پدر بہ کنیں بلکیں وتی نِد ءِ سر ءَ آئی ءِ بیانیاں پروش بہ دے ایں ، آئی ءِ هونڈال ءَ بہ کَش ایں ءُ چَگل بہ دئیں. اگاں ناں اے زوراکی ءِ دیم ءَ هاموشی منی تئی واستو هچ پش نہ گیج اِیت-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-