بلوچستان ءُ عید – ریاض بلوچ

بلوچستان ءُ عید

نبشتہ کار: ریاض بلوچ

دی بلوچستان پوسٹ

اے ساھت ءَ کہ من اے چاریں لبزاں نبشتہ کنگ ءَ آں شپ ءِ نیم ءَ گْوستگ، روچ ءُ رمس بدل بوتگ اَنت – گوستگیں روچ ءَ اد ءَ ائید بوتگ ءُ آیوکیں روچ ءَ ملک ءَ ائید بیت، بلے ائید بس نام ءِ ائید اِنت کہ کاینت ءُ رو اَنت، پہ بلوچ ءَ وشی ءُ شاتکامی اِش مان نیست –

مئے ائید ءِ سھب گوں چار ٹپ ءُ ٹوریں لاشانی دیم ءَ کپگ ءَ بنا بوت ، چار بلوچ بیگواھیں پسگ پاکستانی لشکر ءَ چہ زندان ءَ کشت ءُ برت ھرنائی ءَ دروگیں میڑے ءَ جت ءُ دور دات اَنت ءُ پد ءَ ٹاپار جت کہ چار بلوچ جنگول گوں ریاستی امن پورس (ڈیتھ اسکواڈ) ءِ میڑ ءَ شھید بوتگ –

ائید ءِ روچ اِنت گونڈو نوکیں گُد ءُ جَر پوش اَنت ،وتارا شوک کن اَنت ءُ سمبھین اَنت، مردم کُربانی ءِ پس ءُ گوک کُش اَنت ، ائید مبارکی ءُ ھک پھلی کن اَنت یا مسیج راہ دیوکائی بیت، بلے بلوچستان یک شل ءَ ریاستی زوراکیانی آماچ اِنت ، اسلام ءِ داوا داریں ملک کہ کُرانی آیاتاں چہ وتی جنگی آپریشناں نام دنت بلے نا اسلامی کدرے ھستے نا انسانی اگبال ءَ سرپد بیت –

یک بلوچ جنین زھگے ماہ جبین بیسیمگ ءِ جاھمنند اِنت کہ ھپتگے ءَ پیسر چہ شال ءَ زورانسری اَوار جنگ ءُ برگ بوتگ انگت ءَ بیگواہ اِنت ، آئی ءِ گناہ ءُ میار چی اَنت کہ تو برتگ ؟ اگاں گناہ گار اِنت تو بیار ئِے وتی کورٹ ءُ کچھریاں پیشی بکن ئِے ، ھما الزامے ءَ تو آئی ءِ سر ءَ جن ئے بیا سابت ئِے بکن پد ءَ وتی کونون ءِ رد ءَ سزا ءُ جزا ئِے بدے ، بلے ناں چش نہ کنت بلکیں ھمے وتی گیر کانونی ءُ آئینی کرداں کہ بلوچانی سر ءَ کنگ ءَ اِنت ھمیشاں چہ وتی پارلیمان ءُ اسمبلیاں کانونی ھیسیت دیگ ءَ اِنت ، بزاں کہ پاکستانی لشکر ءَ کدی کجام وھد ءَ کجام بلوچ ءِ بگیر جرم ءَ برگ ءُ گار کنگ ءُ بند کنگ ءِ اجازت ءَ کانون دنت، ھمے کانون کہ زوتاں چہ بلوچستان ءِ اسمبلی ءَ پاس کنگ بوتگ –

بلوچ یکجہتی کمیٹی ءِ رھشون ڈاکٹر ماہ رنگ بلوچ گوں اے دگہ سنگتاں سے ماہ اِنت کہ گیر کانونی بندیگ کنگ بوتگ اَنت ، اے دومی ائید اِنت کہ آ زندانی اَنت –

جرم ءُ گناہ اِش چی اِنت ؟ اے گپ ءَ ھمے بکشو ساھب ءِ واکدار کورٹاں سابت کت نہ کن اَنت، بس دفعہ ھمیش اِنت کہ ایشانی ڈن ءَ بوگ پہ لس مردماں یک بیھارے پمشیا ما ایشاں بندیگ کنیں –

ڈاکٹر ماہ رنگ بلوچ ھما رھشون اِنت کہ پہ آئی ءَ گوانکے ءِ پد ءَ لکھانی مھلوک ڈن ءَ در ریچ اِیت ءُ مُچ بیت ، ھزارانی مھلوک راجی مُچیّ بیت ، چہ ڈاکٹر ماہ رنگ بلوچ یا آئی ءِ گل ءِ نیمگ ءَ کسے ءَ نکس نہ وارتگ نا کہ یک شیشگ ءِ پروشتگ ءَ بلے ھمے در کپتگیں مھلوک کہ تئی ریاست ءِ زوراکیانی ھلاپ ءَ پر امن در کپتگ اَنت ایشانی سر ءَ ریاست ءَ وتی زلم ھم پیش داشتگ تیر گواری کتگ ، مردم شھید ءُٹپی کتگ اَنت ، گڑا جست اِیش اِنت کہ Maintenance of Public Order کئی سر ءَ لاگو بہ بیت ؟ ڈاکٹر ماہ رنگ ءُ آئی ءِ بندیگیں سنگتانی یا سرکار ءِ سپاھیانی ؟

بیگواھیں بلوچانی کھول ھمک سال وتی ائید ءَ پریس کلب ءُ دگانی سر ءَ گوازین اَنت ءُ دنیا ءَ پیش دار اَنت کہ پاکستان چونیں زالم ءُ جابریں ملکے، پہ دپ وتارا مسلمانیں ملکے گش اِیت بلے کرد ءَ چہ اسرائیل ءَ ھم گنتر اِنت ، إسرائيل اگاں پلسطين ءِ جنگولب ءِ ھم جنگ ءَ جنت بلے آئی ءِ لاش ءَ کھول ءَ دنت پہ کل ءُ کسارت کنگ ءَ، اے ریاست بلوچ جنگول ءِ لاش ءَ ھم پہ کل ءٗ کسارت کنگ ءَ نہ دنت، حالانکہ دنیا ءَ اے کانون گیشینتگ کہ کجام ھم جنگول ءِ جنگ ءَ جنگ بوت آئی ءِ لاش دیگ بہ بیت –

ریاست ءِ زوراکیانی سر ءَ ھمینچو نبشتہ بہ کن ئے یا گپ بہ کن ئے نہ کُٹ اَنت اے نوں بلوچ ءِ زند ءِ بھر اَنت، پمیشکا پہ بلوچ ءَ اے وشیں روچ ھم پہ نہ وشی گوزگ ءُ روگ ءَ اِنت ، بلوچستان ءَ چشیں لوگے پشت نہ کپتگ کہ ریاستی جبر ءِ دیمپان نہ بوتگ –

بلوچ ءُ بلوچستان ءِ ائید ھمیش اِنت کہ مئے شئمے دیم ءَ اِنت اگاں چمے بہ بیت پہ گندگ ءَ گوشے بہ بیت پہ اشکنگ –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-