چارشمبے روچ ءَ نوشکی پریس کلب دیم ءَ غنی بلوچ ءِ زورانسری آوار جنی ءِ ھلاپ ءَ آئی ءِ کھول نیمگ ءَ چہ زھرشانی روانک کشگ بیتگ، چریشی ءَ زالبول، چُک ءُ ورنایانی مزنیں کچے ءَ بھر زرتگ-
زھرشانی کنوکانی دست ءَ بینرز ءُ پلے کارڈز چست کتگ بیتگ آیانی سر ءَ زورانسری آوار جنی ءِ ھلاپ ءَ ناراہ نبشتہ بیتگ-
زھرشانی کنوکاں غنی بلوچ ءِ زوت یل کنائینگ ھاتر ءَ ناراہ ءُ ریاستی زوراکی ءِ ھلاپ ءَ وتی گم ءُ زھر درشان کتگ اَنت-
زھرشانی کنوکاں تچکیں لبزاں لوٹ کتگ کہ غنی بلوچ ءَ ھوار سرجمیں زورانسری بیگواھیں مردماں زوت یل کنگ ءُ سرجمیں بیگواھیں مردمانی یل بہ کن اِت-
زانگ بہ بیت کہ نوشکی ءَ چہ سیادی داروکیں غنی بلوچ، بلوچ اسٹوڈنٹس ایکشن کمیٹی ءِ گوستگیں وائس چیئرمین، براھوئی زبان ءِ ایم فل ءِ نودربر ءُ نیشنل ڈیموکریٹک پارٹی ءِ بُنجاھی آرگنائزنگ کمیٹی ءِ باسک اِنت- آ پاکستانی پوج ءَ ھمے سال بیست شش مئی ءَ آوار جتگ ءُ بیگواہ کتگ-