بلوچستان ءِ دمگ کیچ ءَ پاکستانی فوج ءِ کاروانانی سر ءَ سلاہ بندیں مردماں اُرش کتگ کہ ایشی ءِ آسر ءَ فوج ءَ جانی تاوانانی دیمپانی کنگ کپتگ۔
زمران ءِ دمگ کنڈ کاپران ءَ سلاہ بندیں مردماں پاکستانی اُرد ءِ گاڑیانی سر بستگ ءُ اُرش کتگ۔ رپورٹانی رد ءَ اے اُرش ءِ زد ءَ دو گاڑی اتکگ اَنت کہ ایشی ءِ آسر ءَ چار کارندھانی بیران بوگ ءِ ھال انت-
دمگ ءَ لشکر ءِ ھیلی کاپٹر بال کنگ ءَ گندگ بوتگ اَنت بلے واکداراں انگت ءَ اے درگت ءَ دگہ اھوال نہ داتگ انت-
بلوچستان ءَ آجوئی دوستیں گلانی نیمگ ءَ اُرش گیش بوتگ اَنت ۔ اسلام آباد ءِ پاکستان انسٹی ٹیوٹ فار پیس سٹڈیز (PIPS) ءُ پاکستان سینٹر فار کانفلکڑ اینڈ سیکیورٹی اسٹڈیز (PICSS) ءِ نیمگ ءَ شنگ بوتگیں درشان ءَ گوشگ بیتگ کہ ھمے سال ءِ مئی ماہ ءَ پاکستان ءَ سلاہ بندیں اُرش گیش بوتگ انت کہ ایشانی توک ءَ درستاں گیش بلوچستان سانمند انت-
دومی نیمگ ءَ بلوچ آجوئی ءِ گلانی اُرشانی ھالاں جوڑ کنوکیں سگار میڈیا ءِ رد ءَ مئی 2025 ءِ تہ ءَ ایوک ءَ بلوچ لبریشن آرمی ءَ 111 ءَ چہ گیش آپریشن کتگ کہ ایشی ءِ تہ ءَ پاکستانی لشکر ءِ 120 کارندہ بیران ءُ 53 ءَ چہ گیش ٹپیگ بوتگ اَنت۔
سگار میڈیا ءُ بلوچ آجوئی ءِ جھدکارانی من اتگیں ءُ دمگی رسانکدراں چہ رس اتگیں ھالانی بنیاد ءَ شنگ کنت۔
سگار میڈیا ءِ نیمگ ءَ شنگ بوتگیں رپورٹے ءِ رد ءَ بلوچستان ءِ دمگ کلات، پنجگور، کیچ، ءُ شال ھما دمگ بوتگ اَنت کہ اود ءَ بلوچ آجوئی لوٹوکیں سلاہ بندیں گلانی نیمگ ءَ گیشتر آپریشن کنگ بوتگ انت۔
گوستگیں ھپتگ ءَ بلوچ لبریشن آرمی ءَ سوراب ءِ شھر بازیں ادارھاں وتی دستیگی ءَ کتگ ات ءُ ھمے رنگ ءَ مستونگ ءِ پولیس اسٹیشن ءُ یک مزنیں ھائی وے ءِ سر ءَ ناکہ بندی کتگ ات۔ اے وڑیں آپریشن پیسر ءَ کلات ءِ شھر منگچر ءَ ھم بیتگ اَت کہ اود ءَ سدانی کچ ءَ لوچ لبریشن آرمی ءِ سرمچاراں شھر وتی دستیگی ءَ کتگ اَت۔