گرانیں نوبتاں
نبشتہ کار: شیردل بلوچ
دی بلوچستان پوسٹ
زندمان ءِ سپر چوناھا یک روچے کُٹ ایت ءُ آسر بیت، زند انچش گوازینگ بہ بیت مرگ ءَ پد ھم نام گرگ بہ بیت، گڑا شَریں کرد مردم ءَ ابدی زندگ کنت چہ اے دنیا ءَ روگ ءَ پد آئی ءِ نام گرگ بیت، ھما کس پہ وت ءَ وتی لوگ ءِ واست ءَ زند گوازین اَنت، بزانکہ پہ وتی زاتی زندگ بوگ ءَ باز رپک ءُ ھنر کن اَنت زند ءِ روچاں انچش تیلانک دے انت، راجی رھشون چیرمین “ھلیل بلوچ گوش ایت، ھما کس پہ وت ءَ زندگ اَنت مردمے لیکگ بنت پہ دومی ءَ زندگ بوؤک اِنسان گوشگ بنت، ازیم لیکگ بنت ،ازیمیں انسانے ءِ کرد کدی شموشگ نہ بیت، پہ وت ءَ زند گوازینوکانی نام گوں وھد ءِ گوزگ ءَ ھوار گار بیت، ھمایاں پہ دومی ءِ زندگ بوگ ءَ وتی زندمان کولیگ کرتگ ھما ابد اَنت ۔ اَملی اِنساناں وَ سابت کرتگ، وتی زندمان ءِ درائیں وشیاں یلہ داتگ ءُ پہ مکسدے ءِ ھاتر ءَ وتی مُچ وشیاں کربان کرتگ اَنت وَ انچیں ٹوھیں گام زُرتگ، پہ ایدگران زندگ بوگ ارزان کرتگ تاں جھان ءَ ھست گیرآرگ بہ بنت انت۔
اگاں بلوچ راج ءِ نام جھان ءِ گیر آرگ بیت، انچیں تمردانی کارستاں زند بکشتاتگ ءُ وتی ناماں مان راجدپتر ءَ زندگ کرتگ اَنت، کسے کہ گرانیں نوبتاں چو کوہ ءَ اُوشتاتگ ءُ ھرچ وڑیں دیمھونی داتگ ئِے زوراکیں دژمن ءَ چک پروش کرتگ، راجدپتر ءَ نام ئِے پہ دلجمی گرِگ بیت، بلوچ راج ءِ گْوَست بیت یا انوگیں دَور چہ انچیں نرمزاریں پسگ ءُ شیرزالانی ناماں راجدپتر سرکیل ھست، بلوچ راج ءَ را مان جھان ءِ دیم ءَ منائینتگ ھچ دروشم ءَ راجی پجار اِش پولینگ بوگ ءَ نیئشتگ، ھما راج ءِ پھر ءُ شان زانگ بنت ۔
چہ ھمے کولیگ بوتگیں پسگاں یکے شکاری اَلی پنام کُمک بلوچ اِنت، واجہ بجار بلوچ ءِ لوگ ءَ وتی چَمّ پچ کرتگ اَنت، پھلوال ءُ شپانکے ءِ لوگ ءَ رُستگ ءُ مزن بوتگ، جھاؤ ءُ آواران ءِ میانجی ءِ کوھاں جاھمنند بوتگ ھمے کش گوراں وانڈاہ بوتگ اَنت، سپر ءِ سواری اِش اُشتر بوتگ لڈ ءُ بار ءَ راشن ءِ آؤرتگ، انچش مدامی ءَ کوھی دمگاں زند گوزینتگ اَنت، گوں مستریں بْراتاں ھوار وتی کماش ءِ ھمراھداری ءَ مُدامی ءَ گوں بوتگ اَنت، پاھو کور ءَ مالداری کرتگ اُشتر (پس) میش ءُ بُزگل چارین اِتگ اَنت، زمستان ءَ کور ءِ لاپ ءَ اڑ ٹھینتگ پیتاپ دیماں تگردو ءُ گداں جَتگ ھنکیں کرتگ ءُ تیرماہ ءَ ڈھل دیماں درآتکگ ءُ بزانکہ گْوات کپتاں ھنکیں بوتگ اَنت، شَرین زندے گوزین اِتگ ءُ مالداری ءِ پُشت ءَِ وتی زندمان ءَ سک ءَ وشھال بوتگ اَنت، گوں شھر ءُ مھلوک ءَ مھکمیں نزدیکی یے کرتگ اَنت، بزانکہ کہ جھاؤ ،آواران ءُ کولواہ ءِ ھند ءِ مردماں کار ءُ باری نزدیک بوتگ، زندمان روچ انچش تیلانک داتگ اَنت، وھدیکہ جاور گیش نہ گیگ بنت جنگ ءِ توک ءَ ترندی ودی بیت، گڑا کُمک بلوچ راج پھازین پُسگانی رِد ءَ کیت ءُ اُوشت ایت، ءِ راجی جنز ءِ ھمگام بیت، شَریں وڑے ءَ ھمراھداری کن انت چوناھا کوہ گردیں شپانک ءُ شکاری یے بوتگ چہ آئی ءِ ھمراہ بوگ ءَ پہ پند بُراں پند جَنگ گیشتر ارزان بیت، اگاں سرمچاراں گوں راہ بلدے ھمراھداری بہ کنت، رنُگراہ ءُ گٹ ءُ گَران سرپد بہ بیت، کوھاں گٹ مہ بیت، پہ ھمراھداری ءَ چد ءُ مستریں سوگاتے بوت نہ کنت۔
بلوچی ءَ بتلے گوش اَنت:
“کور دو چَمّ لوٹ ایت”
“سپر وت کن اَنت، بلے سپر ءِ داب مٹ ایت”
سنگت اَلی بلوچ ءُ گوں یکروچے سپرے ءَ انچش راھگوزی دُچار کپت آں دگہ ھمراھے گوں اَت ئِے لھتیں سنگت ما ھمے دَمگ ءَ سپرے ءَ اتیں جُست کرتاں ھال بہ دے راہ چون اِنت ۔۔؟ گوشت ئِے زی سھب ءَ ھمے جاہ ءَ سرمچار ءُ پوج ءِ میانجی ءَ میڑھے بوتگ روگّّ ءُ آیگ نیست راہ بند ھست شما ھمے جاہ ءَ بہ جل اِت من ءُ سنگت رواں راھچاری کن آں شمارا کایاں ھال دے آں، کمو دیر پد اتک اَنت سرجمیں ھال اِش دات اَنت، ما جنزان بوتیں ، ھمے سال دوھزار ءُ ھبدہ ءِ گڈسری بھر اَت،گوں آئی ءَ چد ءُ پیش سلام الیک بوتگ اَتاں بلے ھمے روچ ءَ شَری ءَ یکے دومی ءَ سرپد بوگ ءَ موہ رس اِت زانتان ئِے کہ راج ءِ دوزواھے ھست بلوچ ءُ بلوچ ءِ انوگیں میڑہ ءَ سرپد اِنت من ھما روچ ءَ پد جیڑ اتگ اگاں کوھاں پھک ءَ انچیں مردم ھنکیں بہ بنت،سرمچار ءِ پناہ گاہ ( بنجل ) اندیم اَنت، دژمن پہ ارزانی رس اِت نہ کنت ۔
راجی رھشون چیرمین زاھد کرد وتی گْوَشتانک ءَ درشان کُتگ بی این ایپ ءِ مراگشے ماں کراچی ءَ ھشت چوک ءَ اَت گوش ایت ئِے” کہ ھما شپانک پہ راج ءَ بے مٹ اَنت بہ گند ءِ کہ وانندگ نہ اَنت بلے ۔۔۔!! گوں دژمناں ھمراہ نہ بنت، راج ءِ سودا دست مان نہ کنت، ھما وانندگ پہ نوکری یے ءِ واست ءَ لالچ کنت یا جیڑ ایت من ھک ءِ توار جوڑ بہ باں منی پگار بند بیت، منی لوگ آس دیگ بیت، گڑا انچیں وانندگاں راجاناں تاوان داتگ اَنت ۔
شھید سنگت”،شکاری الی پنام کمک بلوچ ءَ گوں سوچکان (مئی ) درائیں شھیداں ھوار سھرچکیں دروت ندر کناں آیاں وتی ھون پہ سرڈگار ءُ راج ءِ وتواجھی ءَ ندر کرتگ اَنت ۔
” بلوچ راج آجو بات “
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-