سوراب شھر ءَ بی ایل اے ءِ دستیگ کنگ ءَ پد واکداراں لس مھلوک ءِ سر ءَ بازیں بندش جتگ انت

بلوچستان ءِ دمگ سوراب ءِ انتزامہ ءَ شھریانی سر ءَ بازیں بندش جنگ ءِ نوٹیفکیشن شنگ کتگ ۔

اے بندش دمگی انتزامیہ ءِ نیمگ ءَ ھمے سال ءِ 30 مئی ءَ بلوچ لبریشن آرمی ءَ شھر ءِ دستیگ کنگ ءُ سرکاری مال ءُ مڈیانی تاوان دیگ ءَ پد ایر کنگ بوتگ انت۔

لس مھلوک ءَ را شنگ بوتگیں نوٹس ءِ تہ ءَ گْوشگ بیتگ کہ شھری سپر ءِ وھد ءَ ماسک مہ جن اَنت ءُ وتی دیم ءَ مہ پوش اَنت وھدے کہ مرچی ءَ بگر داں 10 جون ءَ ڈبل سواری ءِ سر ءَ سرجمیں بندش جنگ بوتگ۔ نوٹس ءِ تہ ءَ گْوشگ بیتگ کہ سلاہ بندیں ادارگانی ھلاپ ءَ آپریشن ءِ وھد ءَ لس مھلوک دور بہ بنت اگاں نہ آھاں ھرچ وڑیں تاوان ءِ زمہ وار سرکار نہ بیت۔

زانگ بہ بیت 30 مئی ءَ بلوچستان ءِ گچینی شھر سوراب ءِ سر ءَ بلوچ لبریشن آرمی ءَ سرجمی ءَ وتی کبزہ کُتگ۔

اے میان ءَ بی ایل اے ءَ شھر ءِ تہ ءَ سرکاری ھاسیں پروجکٹسانی سر ءَ وتی دست گپتگ ات کہ آھانی تہ ءَ بینک، لیویز اسٹیشن ءُ پولیس اسٹیشن ھوار ات انت ءُ کوئٹہ کراچی دگ ءُ سوراب گدر روڈ ءِ سر ءَ ھم چیک ءُ گشت برجاہ بوتگ ات۔

زانگ بہ بیت کہ بلوچستان ءَ گوستگیں سالاں اے وڑیں آپریشن ءِ تہ ءَ گیشی گندگ بوتگ۔ گوستگیں سال ءَ چہ سرجمیں بلوچستان ءَ اے وڑیں وئیل گیش بوتگ اَنت کہ اود ءَ بلوچ آجوئی ءِ جھدکار دمگ یا ھاسیں دگانی سر ءَ پہ وھد ءِ سر ءَ دزمھار کن اَنت۔

بلوچستان ءَ اے وڑیں وئیلانی گیش بوگ ءَ چہ اے گپ پدر بیت کہ بلوچستان ءِ تہ ءَ پاکستانی لشکر ءِ دزمھار نزور بوگ ءَ اِنت، وھدیکہ بلوچ آجوئی ءِ زرمبشت ءِ گِستا مھکم بوان اِنت۔ اے جاوراں چہ اے گپ پدر بیت کہ بلوچستان ءَ پاکستان ءِ رھبند کارآمد سابت نہ بوگ ءَ اِنت۔ چہ ایشی ءَ چپ آجوئی ءِ جُنز گیشتر سرگرم بوتگ۔