پاکستان پوج ءَ بلوچستان ءِ دو جتا جتائیں ھَند ءُ دمگاں آپریشن ءِ وھد ءَ ھپت بلوچ سرمچارانی جنگ ءِ ٹاپار جتگ۔
پاکستان پوج ءِ آئی ایس پی آر ادارہ ءِ نیمگ ءَ گْوشگ بوتگ کہ لشکر ءَ بلوچستان ءِ ھَند کچّی ءِ دمگ مَچّ ءَ بلوچ سلاہ بندیں گلّ ءِ پنچ مردم کُشتگ، ھمے وڑ ءَ دگہ یک آپریشنے ءَ کلات ءِ ھَند مورگند ءِ دمگ ءَ بلوچ سلاہ بندیں گل ءِ دو مردم کُشگ بوتگ۔
آئی ایس پی آر ءِ نیمگ ءَ گْوشگ بوتگ آپریشنانی وھد ءَ چہ کُشتگیں مردماں مزنیں کساسے ءَ سلاہ ءُ گولا بارود ھم دست کپتگ۔
دنیگا کُشتگیں مردمانی پجار کنگ نہ بوتگ، بلے گیشتریں تُرس ءُ گمان ھمیش اِنت کہ اے مردمانی تہ ءَ زور بیگواھیں مردم ھم بوت کن اَنت۔
بلوچستان ءَ چوشیں بازیں ویلے دیم ءَ آتکگ کہ اود ءَ پاکستانی لشکر ءَ وتگڑیں (دیم پہ دیمی) جنگاں، چہ پیسر ءَ زور بیگواہ کتگیں مردم کُشتگ اَنت۔
ھمے سال ءَ بلوچ آجوئی لوٹوکیں گلّانی گیشیں کاروائیاں ءُ ھاسکن جاپر ایکسپریس ءَ بلوچ لبریشن آرمی ءِ نیمگ ءَ ھائی جیک کنگ ءَ رند وتگڑیں جنگ ءُ دیم پہ دیمیاں مردماں کُشگ ءِ ویل ءُ واکیہ گیش بوتگ۔