پنجگور ءَ پاکستانی پوج ءِ دست ءَ ورنا جنگیان بلوچ ءِ زورانسری آوار جنی ءِ ھلاپ ءَ کھول ءَ پروم ءَ فرنٹیئر کور ” ایف سی ” بُنجل دیم ءَ زھرشانی نندانک داتگ-
زھرشانی کنوکاں ورنا ءِ زوت یل کنگ ءِ لوٹ کتگ-
کھول ءِ رِد ءَ بیست ءُ شش مئی پنجگور ءِ دمگ پروم ءَ پاکستانی پوج ءَ یک سرچ آپریشنے ءِ میان ءَ جنگیان بلوچ ءَ ھوار پنچ مردم آوار جتگ اَت، اشی ءَ پد چار مردم یل کتگ اَت، بلے جنگیان بلوچ انگت بیگواہ ءَ اِنت-
کھول ءِ گوشگ اِنت کہ جنگیان بلوچ آوار جنی ءِ میان ءَ لَٹ ءُ کُٹانی نشانگ کتگ ءُ بید دگہ کانودی کاروائی ءَ پوج ءَ وتی ھمراھی ءَ برتگ-
آیانی گوشگ اِنت جنگیان بے گناھے ءُ اشی ءِ ھلاپ ءَ ھچ وڑیں ایپ آئی آر ءُ بھتام نیست-
زھرشانی کنوکیں کھول ءَ بیھار داتگ کہ اگاں جنگیان بلوچ ءَ زوت دیم ءَ آرگ نہ بیت گڑا ناں تھنا ایپ سی بُنجل بلکیں بُنجاھی شھدگ سر ءَ ھم نندانک دے ایں، ءُ اے زھرشانی ھما وھد ءَ تاں برجاہ بیت دانکہ آیانی دوستناک یل کنگ بہ بیت-