بلوچ مرد ءُ زالبول وت کُش بمب تراک کنوک جوڑ بوگ ءَ اَنت، لشکر دفاعی پوزیشن ءَ شتگ اَنت – گوستگیں گورنر ءُ جنرل ابدالکادر بلوچ

پیسریگیں گورنر بلوچستان جنرل (ریٹائرڈ) ابدالکادر بلوچ ءَ گوستگیں روچاں یک مراگشے ءَ گوں تران کنان ءَ گشتگ کہ بلوچستان ءِ تہ ءَ جتائی ءِ لوٹ اے وھد ءَ ریاست ءِ سر ءَ جتا جتائیں رنگاں ارش کنگ ءَ انت؛ آ سرکاری گاڑی ءُ کارندھاں چہ اُرش، ارش یا ناکہ بندی ءِ وسیلہ ءَ نشانگ جوڑ کن اَنت یا آیانی سلاھاں بَر اَنت، آوار جن اَنت ءُ اے پہ آھاں روچ پہ روچ ءِ روٹین جوڑ بوتگ کہ آ ٹولی ءِ دروشم ءَ کاینت ءُ کارروائی کن اَنت ءُ آ اے کار ءِ تہ ءَ ماھر اَنت۔

آئی ءَ گْوشت کہ 2024 ءُ اے سال ءَ اے کار گیش بوتگ انت، ءُ بلوچستان ءِ شھرانی سر ءَ ڈرائیونگ آسان نہ انت۔

آئی ءَ گْوشت کہ جاور پریشان کُن انت، ورنا وانندھیں جنک وت کُشیں اُرش کنگ ءَ انت، تاں انوگ ءَ چار جنین آدماں اُرش کتگ، وھدے مردین مزنیں کساسے ءَ اُرش کن انت آ وت ءَ تراک کن انت ءُ آھانی تہ ءَ جنت ءُ جھنم ءِ پلسپہ نیست۔

آئی ءَ گْوشت کہ ایشانی ھلاپ ءَ شما کارروائی کن اِت۔ کُشگ ءُ مِرگ ءِ نیت ءَ کاینت ءُ سئے چار دمگاں مزنیں کساسے ءَ کاینت ءُ مال ءُ مڈی ءُ سلاھاں جم کن اَنت۔

آئی ءَ گْوشت کہ بلوچ جنگول انوگ ءَ مئے انٹیلی جنس، آھاں نشانگ جوڑ کنگ ءَ انت۔ پیسر ءَ کانون ناپذ کنوکیں ادارھانی یک برتری یے بوتگ کہ آ کاینت ءُ کارروائی کن اَنت بلے نوکیں جاور ھال ایش اِنت کہ آ ھم نوں اُرشانی آماچ اَنت کہ ایشی ءِ سوب ءَ آ پہ آپریشن ءِ کنگ ءَ وتی رزاکارانہ دیم ءَ نیا اَنت، بلکیں آ چہ اے مردماں (جنگجو) ءَ ترسگ ءَ اَنت۔

جنرل کادر ءَ گُشتگ کہ بلوچستان ءَ گوں سیادی نہ داروکیں دگہ دمگاں چہ مردمانی کُشگ ءِ وئیل بوگ ءَ انت، ءُ ایران ءَ ھم پنجابی کُشگ ءِ وئیل بوتگ انت کہ اے بژن ءِ گپ انت۔

شھرانی سر ءَ دھرنا ءِ کیسانی تہ ءَ گیشی انت ۔ ھر وھد ءَ کہ آپریشن بیت گڑا مزنیں کساسے ءَ جنین ءُ چُک شھرانی سر ءَ زھرشانی کن اَنت ءُ بازیں روچاں شھراں بند کن اَنت۔

کاؤنٹر انسرجنسی ءِ ھوالگ ءَ آئی ءَ گْوشت کہ امن ءُ ایمنی ءِ برجائی ءِ ذمہ واری لیویز پورس 75 درسد اِنت بلے آ اے وڑیں کارروائی کنگ ءَ سوبین نہ بوتگ اَنت بلکیں آھانی سلاہ چست کنگ بوتگ اَنت ءُ پوسٹ ماندارگ بوتگ اَنت۔ پولیس ھمک آسراتیاں اَبید ھم بلوچستان ءِ توک ءَ اے وڑیں آپریشن کنگ ءَ بے سوب اِنت۔

جنرل کادر ءَ گُشتگ کہ بلوچستان ءَ 70 ھزار ءِ نزیک ءَ پرنٹیئر کور ءِ کارندہ آرگ بوتگ انت کہ آھانی سر ءَ کروڑاں کلدار ھرچ کنگ بوگ ءَ انت بلے اے وھد ءَ پرنٹیئر کور ھم رکینگی پوزیشن ءَ شتگ۔