تربت : پاکستانی پوج ءِ دست ءَ زورانسری بیگواہ کنگ بیتگیں پولیس کارندہ ءِ یل نہ کنگ ءِ ھلاپ ءَ زھرشانی برجاہ

گیشیں ھالانی رِد ءَ بلوچ پولیس کارندہ ءِ زورانسری آوار جنی ءِ ھلاپ ءَ دو روچاں چہ سی پیک شھدگ سر ءَ ھوار سرجمیں لنک دگ بند اَنت وھدے کہ ایم ایٹ شھدگ سر ءَ زالبولانی نندانک برجاہ ءَ اِنت- اے بندی ءِ سبب ءَ ھزارانی گاڑی ءُ مساپر گٹ بیتگ اَنت-

زالبولاں عومری کھن ءِ ھند سر ءَ سی پیک ءُ ایم- ایٹ شھدگ بند کتگ ھرچ وڑیں گاڑیانی روگ ءَ آیگ بند کتگ- زھرشانی کنوکاں زالبول ءُ چُک ھم ھوار اَنت کہ چہ تربت ءَ زورانسری آوار جنگ بیتگ اَنت پولیس کارندہ غلام محمد ءِ یل کنائینگ لوٹ ءَ کنگ ءَ اَنت-

زھرشانی کنوکانی گوشگ اِنت، غلام محمد پاکستانی پوج ءِ ادارھاں ھما وھد ءَ زورانسری بیگواہ کتگ ، وھدے آ ڈیوٹی ءَ چہ واتر آیگ ءَ بیتگ – آ تربت ءِ ڈگری کالج ءِ دیم ءَ چہ چست کتگ ءُ انگت آئی ءِ درگت ءَ کھول ءَ ھچ وڑیں ھال دیگ نہ بیتگ-

پشمبے ءَ زھرشانی ءِ دومی روچ، زھرشانی کنوکاں شال ءُ بلوچستان ءِ آ دگہ دمگاں چہ پیادگ آؤکیں مساپرانی دارگ جُھد کتگ، کہ ٹرانسپورٹ والواں راہ نیم ءَ یل داتگ اِت اَنت- اے میان ءَ بازیں مردمانی گوم ءَ دست جنگی ھم بیتگ-

دو روچ ءَ چہ یکشل ءَ شھدگانی بندی ءِ سبب ءَ، دوئیں نیمگاں درزنانی گاڑی ءُ ھزارانی مساپر گٹ بیتگ اَنت- چاگردی گلاں دمگی انتزامیہ ھاسکار ڈپٹی کمشنر کیچ ءَ چہ لوٹ کتگ کہ زھرشانی کنوکاں گپ دیوان بہ کن اِت ءُ شھدگ ءَ پچ بہ کن اِت-