نیشنل ڈیموکریٹک پارٹی ءِ بُنجاھی جارکش ءَ گُشتگ کہ گوستگیں شپ ءِ ساھت کساس سے بج ءَ پاکستانی لشکر ءَ چہ شال ءِ سول ھسپتال ءَ بسیمہ ءِ جھمنندیں نودربر ماہ جبین بلوچ زورانسری بیگواہ کتگ۔
جارکش ءَ گْوشتگ ماہ جبین بلوچ بلوچستان یونیورسٹی ءِ بی ایس لائبریری سائنس ءِ نودربر اِنت کہ آئی ءَ را پولیس ءِ کارندھانی ھمراھی ءَ سادہ پوشیں سرکاری ادارگ ءِ کارندھاں پہ زور دزگیر کتگ۔ داں انوگ ءَ نہ ماہ جبین بلوچ ءِ دزگیر کنگ ءِ ھچ سرکاری ادارگ ءَ منّ اِتگ ءُ نہ آئی ءَ را ھچ تھانہ ءُ آمیدگس ءَ پیش کنگ بوتگ ءُ نہ آئی ءِ ھست بوگ ءِ ھال، آئی ءِ کھول ءَ داتگ۔
آئی ءَ گوشت کہ اے ھاموشی ءُ انکار ءَ چہ پدّریں رنگے ءَ پدر بیت کہ اے یک زوراکیں بیگواھی یے، اے پاکستان ءِ آئین ءُ میان اوستمانی انسانی ھکانی کانودانی پدّریں ھلاپ ورزی اِنت۔ ماہ جبین بلوچ ءِ اے زوراکیں بیگواہ کنگ ھما بدتریں جاورھالانی آدینک اِنت کہ ایشی ءِ تہ ءَ بلوچ زالبولیں نودربر ءُ زالبول ھم ریاستی زُلم ءِ چیر ءَ آرگ بیگ ءَ اَنت۔
آئی ءَ گْوشتگ کہ بلوچستان ءَ بلوچ مردین، پیر ءُ ورنا دیر اِنت کہ زوراکی ءَ گار ءُ بیگواہ کنگ ءُ در آمیدگس ءَ دزگیری ءِ آماچ اَنت۔ لھتیں روچ پیسر ماہ جبین ءِ برات مھمد یونس کہ وت نودربرے ھم چہ وتی لوگ ءَ بسیمہ ءَ زوراکی ءَ بیگواہ کنگ بوتگ ءُ تاں انوگ ءَ آئی ءِ بابت ءَ ھچ وڑیں ھال ءُ اھوال دست نہ کپتگ۔ بلے نوں بلوچ زالبول ھم اے زالمیں رواج ءِ تہ ءَ ھوار کنگ بیگ ءَ اَنت ءُ ماہ جبین بلوچ ءِ بیگواہ کنگ بلوچ دود ءُ ربیدگ ءِ ھمراھی ءَ زالبول ءِ شرپ ءُ ایمنی ءِ رھبندانی ھم ھلاپ اِنت وھدے کہ اے وڑیں ریاستی کارانی دیم ءَ چو سیسہ ءِ دیوال ءَ اوشتگی بیت۔ وھدے کہ چوشیں کارروائی ءِ تہ ءَ لھتے عناصر ھاندان ءَ گوں رھوت کن اَنت ءُ آھاں بے تواری ءِ شور ءَ دے اَنت کہ اے یک مزنیں جیڑھے پرچا کہ در آئینی ءُ ناجائزیں کارانی سر ءَ بے تواری وت یک جرمے ۔
جارکش ءَ گْوشتگ ما چہ سرکار ءُ ھمگرنچیں ادارگاں لوٹ کن ایں کہ ماہ جبین بلوچ زوت دیم ءَ آرگ بہ بیت ءُ آئی ءِ زورانسری بیگواھی ءَ ھمگرنچیں درائیں ادارگ چار ءُ ٹپاس کنگ بہ بنت۔ پد ءَ بلوچستان ءَ پہ زور بیگواہ کنگ ءِ اے اَمل سرجمی ءَ ھلاس کنگ بہ بیت دانکہ ھچ کس چہ وتی زند ءُ آجوئی ءِ ھک ءَ زبھر مہ بیت۔ ما چہ میان اُستمانی ءُ دمگی انسانی ھکانی گل، اھوالکار، وکیل ءُ سیاسی ءُ چاگردی جھدکاراں دزبندی کن ایں کہ پہ ماہ جبین بلوچ ءِ پچ گرگ ءُ بلوچستان ءَ پہ زور گار ءُ بیگواھی ءِ ھلاس کنگ ءَ وتی توار ءَ چِست بہ کن اَنت۔ اے وھد اتکگ کہ ما زلم ءُ زوراکی ءِ ھلاپ ءَ یکجاہ بہ بَہ اِیں ءُ انچیں چاگردے جوڑ بہ کنیں کہ اود ءَ ھر یک مردمے وتی ھکانی ھاتر ءَ بے ترس ءُ بیم ءَ وتی توار ءَ چست بہ کنت۔