بلوچستان ءِ دمگ آواران ءَ گوستگیں شپ ءَ یک جنینے ءَ ھوار دو مردمانی کوش ءِ ھلاپ ءَ سرجمیں شھر ءَ ھڑتال کنگ بیتگ۔ دراھیں کاروباری بُنجاہ ءُ دکان بند بوتگ اَنت وھدے کہ سرکاری کار ءُ کرد بند بوتگ اَنت۔
دمگی مردمانی رد ءَ گوستگیں شپ ءَ یک بج ءِ نزیک ءَ پاکستانی لشکر ءَ آواران ءِ دمگ مالار مچھی ءَ بازیں لوگانی سر ءَ اُرش کتگ۔ اے وھد ءَ دمگی مردمانی گھگیری ءِ سر ءَ لشکر ءَ لس مھلوک ءِ سر ءَ تیرگواری کت کہ ایشی ءِ آسر ءَ سنجر بلوچ ءِ چُک نئیم بلوچ ءُ ھوری ء کاسم بیران بوتگ اَنت ءُ یک نزوریں جنینے دادی بلوچ سک ٹپی بوت۔
اے وئیل ءَ پد بلوچ وومن پورم ءَ اے وئیل ءِ گھگیر کتگ ءُ ھڑتال ءِ لوٹ کتگ کہ لس مھلوک ءَ گوں سرجمیں زور ءَ پَسّو داتگ ءُ زھرشانی ءِ رد ءَ شھر بند کتگ۔
بلوچ وومن پورم ءَ وتی بیان ءِ تہ ءَ گْوشتگ کہ اے سال ءِ بندات ءَ چہ آواران ءَ بے آمیدگسی کوش ءِ بازیں جاور بوتگ اَنت، ءُ ایوک ءَ یک ھپتگے ءِ تہ ءَ اے پنچمی وئیل اِنت۔
آئی ءِ گْوشگ ءِ رد ءَ بلوچستان ءَ سرکاری ادارگاں سرجم ءَ (استثنی) دیگ بوتگ اَنت ءُ آ بے ھچ کانودی جواز ءَ زور کارمرد کنگ ءَ اَنت۔
بلوچ یکجھتی کمیٹی ءَ ھم اے وئیل ءِ سر ءَ پدردی درشان کتگ ءُ گْوشتگ کہ نئیم بلوچ ءُ آئی ءِ ماس ھوری بی بی پاکستانی لشکر ءِ تیرگواری ءَ بیران بوتگ اَنت۔ کمیٹی ءِ رد ءَ اے اولی رند نہ اِنت کہ اے ھاندان ءِ نشانگ جوڑ کنگ بوتگ۔ 2015 ءَ نئیم ءِ دگہ یک ماسی یے گوھر بلوچ ءُ آئی ءِ ھپت سیاد ءُ وارس یک بالی اُرشے ءَ بیران بوتگ اَنت۔ 2023 ءَ نئیم بلوچ وت ھم زور بیگواہ کنگ بوتگ۔ آئی ءِ مات کہ نوں اے وئیل ءَ ٹپیگ اِنت، پیسر ءَ ھم پاکستانی لشکر ءَ دزگیر کتگ۔
بیان ءِ تہ ءَ گیش گْوشگ بیتگ کہ گوستگیں لھتیں روچاں ایوک ءَ آواران ءُ مشکے ءِ دمگ ءَ درجناں مردم بے آمیدگسی ءَ کُشگ بوتگ اَنت بلے ملکی رسانکدر بے توار اِنت ءُ میان اُستمانی تک ءَ ھچ وڑیں پسو ءِ دیم ءَ نہ آتکگ۔
بلوچ یکجھتی کمیٹی ءُ بلوچ وومن پورم ءَ چہ میان اُستمانی گل، ءُ میان استمانی انسانی ھکانی گلاں دزبندی کتگ کہ اے وئیلانی سر ءَ یک آجوئیں، شُوھاز ءُ میان اُستمانی پٹ ءُ پولے ءِ بندوبست ءَ بہ کن اَنت۔
دوئیں گلاں گْوشتگ کہ اے جاور ایوک ءَ زاتی جیڑہ نہ اَنت بلکیں یک یکجاھیں پالیسی یے ءِ بھر اَنت کہ ایشی ءِ مول ءُ مراد بلوچ ءِ پجار، گھگیر ءُ ھست بوگ ءِ ھلاس کنگ اِنت۔