آئی ایس پی آر ءِ بلوچ یکجھتی کمیٹی ءِ رھشوناں بے ثبوت ءَ گدار گوشگ مسکرائے – ساجد ترین ایڈوکیٹ

دو شمبے ءِ روچ ءَ بلوچستان نیشنل پاٹی ءِ بنجاھی کمک سرکماش ساجد ترین ایڈوکیٹ ءَ پاٹی ءِ دگہ رھشونانی ھمرائی شال پریس کلب ءَ گوں اھوالکاراں تران کنان ءَ گوشتگ کہ آیس آیس پی آر ءِ بلوچ یکجھتی کمیٹی ءِ رھشوناں بے ثبوت ءَ گدار گوشگ یک مسکرایے – اے ملک ءِ تہ ءَ ھر مدام کہ یکے راست گوش ایت یا زوراکی ءِ بگیری ءَ توار چست کنگ ءِ ھمت ءَ کنت گڈا آ گدار گوشگ بیت –

ساجد ترین ایڈوکیٹ ءَ گوشتگ کہ ما راست گوشتگ بوتگ وھدیکہ من بلوچستان ہائی کورٹ ءِ بنچ یک ءِ ججاں گوشتگ کہ آ وتی سی وی آں تیار کنگ ءَ انت، ھردو ججاں مھرنگ بلوچ، بیبو بلوچ، گلزادی، شاہ جی، بیبرگ، ماما گپار ءُ بی وائی سی ءِ ایدگہ رھشونانی بگیری ءَ پیسلہ ءِ اولی روچ ءَ وتی ذھن جوڈ کتگ بوتگ – من آ ڈرامہ ءِ بھر جوڈ بوت نہ کناں –

آئی ءَ گوشتگ کہ سردار اختر مینگل ءُ بلوچستان نیشنل پاٹی ءَ مدامی بلوچستان ءِ ایردستیں راج ءِ ھاتر ءَ توار چست کتگ – ما اے گدار” گشوکاں شری ءَ سرپد ایں – سیاسی باسکاں ناشرکار ءِ گوشگ ءَ ھچ نہ رس ایت –

آئی ءَ گوشتگ کہ مزنیں ائید ءَ باد سیاسی بندیگانی یل کنائینگ ءِ ھاتر ءَ بی این پی، گرینڈ اپوزیشن الائنس ءَ ھواریں پاٹیانی ھمراھی ءَ سرجمیں ملک ءَ زھرشانی کنت –

آئی ءَ گوشتگ کہ بی این پی ءَ سردار اختر مینگل ءِ سروکی ءَ بلوچستان ءِ جنک ءُ بچکیں زھگانی یل کنائینگ ءِ ھاتر ءَ نندانک داتگ ءُ سرجمیں بلوچستان ءَ مچی ءُ روانک کش اِتگ –

آئی ءَ گوشتگ کہ پاٹی ءِ سیکریٹری اطلاعات آغا حسن بلوچ ءِ نام ءَ پٹٹیشن ءِ تہ ءَ ابید ما ہائی کورٹ ءِ بنچ یک ءَ یکشل ءَ لوٹ کتگ کہ مئے کیس دومی بنچ ءَ دیگ بہ بیت – بلے آیاں کیس وتی گور ءَ داشتگ، پرچا کہ آیاں اولسر ءَ رہاست یا سرکار باور کنائینتگ کہ آ بلوچ یکجھتء کمیٹی رھشونانی بگیری ءَ وتی پیسلہ ءَ.دئینت –

آئی ءَ گوشتگ کہ ما ہائی کورٹ بنچ یک ءِ اے پیسلہ ءَ ترندی ءَ گوں ایر جن ایں ، کہ آئی ءَ ہائی کورٹ واک ڈی سی ءَ داتگ انت،- ھنچیں جج انت کہ دومیانی گوشگ ءِ پد ءَ پیسلہ کن انت، ادارھاں تباہ کنگ ءَ انت –

آئی ءَ گوشتگ کہ پاٹی باسکانی ترسینگ ءِ ھاتر ءَ آیانی سرا درکانودی مقدمہ جنگ بوگ ءَ انت – بلوچستان ءِ جیڑہ یک سیاسی جیڑہ یے –