شال ءُ زامران ءَ پوج ءِ سر ءَ اُرش، راشن بروکیں گاڑی ماندارگ بیتگ انت

بلوچستان ءِ بنجاھی شھر شال ءُ کیچ ءَ پوج ءِ سر ءَ ناشناسیں مردماں اُرش کتگ انت- راشن بروکیں گاڑی ماندارگ بیتگ انت-

بلوچستان ءِ بنجاھی شھر شال ءَ پاکستانی پورسز ءِ چیک پوسٹ ءِ سر ءَ ناشناسیں مردماں دزبمبے چگل داتگ-

دمگی اھوالانی رد ءَ اے اُرش دشت درخشان ءَ پیش اتکگ ، پورسز ءِ چوکی ءِ سر ءَ کنگ بوتگ۔ وئیل ءَ پد پورسز ءَ دمگ انگیر ءَ کتگ ءُ چمدیستگیں مردم یکجاہ کتگ ءُ دمگ ءَ چِک ءُ تان ترند کتگ-

زانگ بہ بیت کہ پیسر ءَ ھم اے وڑیں اُرشانی زمہ واری بلوچ آجوئی ءِ گلاں من اتگ انت، بلے دنیگت ءَ اے اُرش ءِ زمہ واری ھچ گل ءَ نہ من اتگ-

دومی نیمگ ءَ کیچ ءِ دمگ زامران آرچن کور ءَ ناشناسیں مردماں پاکستانی پوج ءِ واستا راشن بروکیں دو گاڑی مانداشتگ انت-

وئیل ھما وھد ءَ پیش اتکگ اے گاڑی پوجی چوکی ءِ نیمگ ءَ جنزگ ءَ بیتگ انت کہ ناشناساں سوتکگ انت وئیل ءَ دگہ جانی تاوان نہ بیتگ انت بلے دوئیں گاڑی سرجم ءَ ستکگ ءُ تباہ بیتگ انت-

ھمے وڑ زامران ءَ ساہ دیم ءَ پوجی بنجل ءِ سر ءَ ناشناسیں مردماں مزنیں سلاھانی گون ءَ اُرش کتگ ءُ چریشی ءَ پوج ءَ جانی تاوانانی دیمپانی کنگ کپتگ-

تنی وھدی اے اُرشانی زمہ واری ھچ گل ءَ نہ زرتگ انت ءُ پوج ءِ واکدارانی نیمگ ءَ ھم اے درگت ءَ دگہ اھوال دیم ءَ نیتکگ انت-