آواران ءَ بیگواھیں مردم ءِ لاش دزکپتگ، ھزدار ءَ یک مردمے بیگواہ

بلوچستان ءَ زورانسری بیگواھیں مردمانی لاشانی دزکپگ ءِ درچ یکشل ءَ برجاہ انت دگہ بندیگیں مردمے ءِ دزکپتگ کہ اے چارُمی لاش انت کہ چِد ءُ پیش سی ٹی ڈی ءَ اَچ بارکھان ءَ سَے مردمانی لاش ھسپتال ءَ رسینتگ انت کہ آ پیش ءَ بندیگ بیتگ انت-

بلوچستان ءِ دمگ آواران ءِ تھسیل کولواہ ءَ پاکستانی لشکر ءَ غوث بخش نامیں ورنایے وتی بنجل ءَ لوٹائینتگ ءُ پد ءَ ورناہ بیگواہ بوتگ۔ لھتیں کلاکانی تہ ءَ آئی ءِ لٹ شاپ کتگیں لاش دزکپتگ-

دمگی مردمانی رد ءَ سھب ءَ پاکستانی لشکر ءَ غوث بخش وتی کیمپ ءَ لوٹائینتگ۔ آئی ءِ لاش لھتیں کلاکاں پد دست کپتگ کہ آئی ءِ سر ءَ لٹانی نشانی گندگ بوتگ اتنت۔

دمگی مردمانی گْوشگ اِنت کہ اے ورنا زندان ءِ وھد ءَ کُشگ بیتگ ءُ آئی ءِ لاش بیابان ءَ دور دیگ بیتگ۔

اے وئیل ءِ بابت ءَ بلوچ پھناتانی گْوشگ انت کہ اے وئیل بلوچستان ءِ تہ ءَ یک دراجیں ءُ دردناکیں سلسلھے برجاہ انت کہ اود ءَ زورانسری بیگواہ کنگ، لٹ شاپ کنگ ءُ بے کانود ءَ کُشگ ءِ وڑیں ھال بوگ ءَ انت۔ غوث بخش ءِ کسہ تھنا یک پردے ئے نہ انت بلکیں بلوچستان ءَ ھزاراں بیگواھیں مردمانی کسہ انت۔

زانگ بہ بیت کہ گوستگیں دو دھکاں بلوچستان ءَ زورانسری بیگواھی ءِ درچ برجاہ انت بلے گوستگیں لھتے سالاں بیگواھی ءِ کچ یک بے ھسابیں رنگے ءَ گیش بوتگ انت-

اھوالانی رد ءَ ھمے وڑ ءَ اچ ھزدار ءَ یک مردمے پوج ءَ آوار جتگ ءُ برتگ-

آوار جنگ بیتگیں مردم ءِ پچار نیشنل ڈیموکریٹک پاٹی ءِ بنجاھی آرگنائزنگ کمیٹی ءِ باسک غنی بلوچ ءِ نام ءَ زانگ بیتگ-

نیشنل ڈیموکریٹک پاٹی ءِ رد ءَ غنی گوستگیں شپ ءَ ھزدار ءِ نزیک ءَ شال کراچی ءَ روگ ءِ وھد ءَ بیگواہ کنگ بیتگ-

اَچ نوشکی ءَ سیادی داروکیں غنی بلوچ ، بلوچ اسٹوڈنٹس ایکشن کمیٹی ءِ گوستگیں وائس چیئرمین بیتگ ءُ آ براھوئی زبان ءِ ایم فل ءِ نودربرے-