سنگت جابر نصیر ءُ سنگت فقیر جان نمیران بوتگ انت – بی ایل اے

بلوچ آجوئی لوٹوکیں سلاہ بندیں گل بی ایل اے ءِ جارکش جیئند بلوچ رسانکدراں وتی شنگ کرتگیں درشان ءِ تہ ءَ گوشتگ کہ بلوچ لبریشن آرمی ءِ دو سرمچار کیچ ءِ دمگ بلیدہ ءَ پاکستانی پوج ءُ آئی ءِ جوڈ کتگیں کُشندہ ٹولی ءِ گوم ءَ جنگ دیان ءَ نمیران بوتگ انت –

جارکش ءَ سرجمیں ھال داتگ ءُ گوشتگ کہ بیست ءُ یک مئی ءَ بلوچ لبریشن آرمی ءِ سرمچاراں بلیدہ ءِ دمگ گردانک ءَ زورگریں پوج ءُ کُشندہ ٹولی ءِ تر ءُ گرد کنگ ءِ ھال سر بوگ ءَ تر ءُ تاب بندات کتگ کہ بیگاہ ءِ وھد ءَ بلو کوئی گز” ءَ سرمچار ءُ دژمن ءِ چاریگ دپ کپتگ انت کہ ترندیں میڑ ءِ بندات بوتگ –

آئی ءَ گوشتگ کہ اے میڑ کساس یک ادارے ءَ تاں برجاہ بوتگ، کہ پاکستانی پوج ءُ آئی ءِ کمکاراں جانی تاوان رس اِتگ – ھمے میڑ ءَ بلوچ لبریشن آرمی ءِ دو دلیریں سرمچار سنگت جابر نصیر ءُ سنگت فقیر جان نمیران بوتگ انت –

جارکش ءَ گوشتگ کہ نمیرانیں سنگت جابر نصیر پنام سمیر ء نصیر بلیدہ ءِ دمگ زیردان ءَ نندوک بوتگ – آ سال 2020 ءَ بلوچ لبریشن آرمی ءَ گوں بندوک بوتگ ءُ بندات ءَ آئی ءَ بازار ءَ گوریلہ ءِ وڈا وتی کرد پیلو کُتگ – دوھزار ءُ بیست ءُ یک ءَ آ کوہ ءَ شُتگ ءُ پدا جتا جتائیں ھند ءُ دمگاں وتی کرد پیلو کتگ –

سنگت جابر نصیر ءَ گل ءِ تر ءُ گردی ءِ زمہ واری گون بوتگ انت – زامران، دشت، ساہیجی ءُ تربت ءَ بازیں کاراں بھر زرتگ ءُ دژمن ءِ بگیری ءَ کلیتی کرد پیلو کتگ – آ یک سرجم ءُ مھکمیں سرمچار ءِ بوتگ کہ آئی ءِ زند دژمن ءَ پروش دیگ ءِ شور ءَ گوستگ –

جارکش ءَ گوشتگ کہ نمیرانیں سنگت فقیر جان پنام میر جان ء غلام رسول بلیدہ ءِ دمگ گردانک ءِ نندوک بوتگ – آ سال دوھزار ءُ بیست ءُ دو ءَ بی ایل اے ءَ ھوار بوتگ ءُ بازیں وھدے ءَ وتی پھتوی، ایمانداری سوب ءَ گل ءِ جوانیں باسک ءِ جوڈ بوتگ – آئی ءَ تربت، بلیدہ، زامران، ہیرونک ءُ سامی ءَ وتی کرد پیلو کتگ – فقیر جان رھبندی، ثابت کدم ءُ آشوبی زانت ءَ سر ریچیں ورنایے بوتگ -.

جارکش جیئند بلوچ ءَ گوشتگ کہ اے نمیرانیں سرمچار ناکہ ایوک ءَ بی ایل اے ءِ بلکیں بلوچ گھگیری زرمبش ءِ سرمایہ انت – آیانی نمیرانی ایردستیں راج ءِ باسمائی، ھوسلہ، ءُ آجوئی ءِ واب ءَ تاگت دنت – سنگت جابر نصیر ءُ سنگت فقیر جان ءِ جھد ءُ دیمھونی آؤکیں پدریچ ءِ ھاتر ءَ روکیں چراگے ءِ مانند انت – بلوچ راج وتی اے پرزندان دیمھونی ءَ ھچبر بیھال نہ کنت ءُ آیانی مشن ءَ تاں منزل ءَ سر کنگ ءَ جھد ءَ برجاہ دار ایت –