بلوچستان ءِ بنجاھی شھر شال ءُ چہ کیچ ءَ زورانسری بیگواہ کنگ ءِ دگہ دو کیس رپورٹ کنگ بوتگ انت۔
اھوالانی رد ءَ گوستگیں شپ ءَ بلوچستان ءِ دمگ کیچ ءِ دمگ تمپ ملک آباد ءَ پاکستانی لشکر ءَ یک ورناھے دزگیر کتگ ءُ بیگواہ کتگ۔
دزگیریں ورنا ءِ پجار عنایت اللہ ء عبداللہ ءِ نام ءَ بوتگ۔
دمگی مردمانی گشگ انت کہ بیگواھیں مردم ءِ لوگ ءِ سر ءَ دو روچ پیسر دستی بمبانی گون اُرش کنگ بوتگ۔ ھالانی رد ءَ گْوشگ بیت کہ اے اُرش کنوکانی سیادی سرکاری کمک ءِ سلاہ بندیں گلے ءَ ھمگرنچ اَنت کہ آ ”ڈیتھ اسکواڈ“ ءِ نام ءَ زانگ بیت انت۔
دومی نیمگ ءَ سی ٹی ڈی ءِ کارندھاں ھمے سال ءِ مئی 21 ءَ شپ ءِ دو بج ءَ شال سریاب ءِ نندوکیں عمیر لانگو ء خورشید ءِ لوگ ءَ چھاپہ جتگ ءُ عمیر بلوچ گوں وت برتگ کہ داں روچ ء مرچی بیگواہ اِنت۔ یات بہ دار اِت کہ عمیر ششمی کلاس ءِ نودربرے اِنت۔
کھول ءَ ایشانی سلامتی ءَ یل دیگ ءِ لوٹ کتگ-