بلوچستان ءَ زورانسری بیگواھیانی درچ یکشل ءَ برجاہ انت ءُ دو جتا جتائیں دمگاں پاکستانی لشکر ءَ سَے مردم آوار جتگ ءُ بیگواہ کتگ انت-
گیشیں ھالانی رد ءَ تیابدپی شھر پسنی ءِ ھند ریکپُشت ءَ سیادی داروکیں دو ورنا شوکت رھمت ءُ گوھر بخش پاکستانی لشکر ءَ دزگیر کتگ ءُ ناشناسیں جاھاں برتگ انت-
دوئیں ورناہ ھجامے ءِ دکان ءَ کار ءَ بیتگ انت-
ھمے وڑ کیچ ءِ بنجاھی شھر تربت ءَ پاکستانی لشکر ءَ بلوچ نیشنل مومنٹ ءِ بنجاھی فنانس سیکریٹری ناصیر بلوچ ءِ لوگ ءَ بیڑ برتگ ءُ آئی ءِ برات ءِ چُک عدنان لیاقت دزگیر کتگ ءُ ناشناسیں جاھے ءَ برتگ۔
اھوالانی رد ءَ بیڑ ءِ وھد ءَ لورسز ءَ لوگ ءِ سرجمی ءَ پٹ ءُ پول کتگ ءُ جنین ءُ زھگ لٹ شاپ کتگ امت۔
بلوچستان ءَ زورانسری بیگواھی درچ گیش بوھگ ءَ اِنت۔ انسانی ھکانی گلاں اے بابت ءَ یکشل ءَ پدردی درشان کنگ ءَ انت بلے جاور ھال شر بوھگ ءِ بدل ءَ گیش ناگیگ بوگ ءَ انت-