پنچ شمبے ءِ روچ ءَ برتانیہ ءِ بُنجل ءِ سرکاری گل ایکشن آن آرمڈ وائلنس ءِ نیمگ ءَ شنگ بوتگیں رپورٹ ءِ رد ءَ 2024 ءَ پاکستان ھما ملکانی تہ ءَ ھپتمی نمبر ءَ اِنت کہ اود ءَ تراکناکیں سلاھانی سبب ءَ شھریاں گیشتر تاوان رس اتگ۔
رپورٹ ءِ تہ ءَ گشگ بوتگ کہ 2024 ءَ پاکستان ءَ 248 وئیلانی تہ ءَ 790 لس مردم آماچ بوتگ اَنت کہ ایشی ءِ تہ ءَ 210 لس مردم بیران بوتگ اَنت۔ اے کچ ءُ کساس 2023 ءِ مکابلہ ءَ شھری مردمانی بیرانی ءِ تہ ءَ 9 درسد کمی ءِ زاھری ءِ درشان کتگ انت، البت اے وئیلانی تہ ءَ 11 درسد گیشی بوتگ کہ 2023 ءَ 218 بوتگ۔
اے رپورٹ ءِ سرھال ’’سلاہ بندیں زوراکی ءِ ھلاپ ءَ کارروائی‘‘ اِنت ءُ اے رپورٹ ءَ پاکستان ءَ را 2024 ءَ تراکناکیں سلاھانی سبب ءَ گیشتر آماچیں 15 ملک ءُ دمگانی لڑ ءَ پاکستان ءِ ھپتمی نمبر ءَ ھوار اِنت۔
رپورٹ ءِ رد ءَ شھریانی سر ءَ بوتگیں تاوان ءِ گیشتریں بھر ءِ زمہ وار در ریاستی باسک لیکگ بوتگ اَنت کہ 76 درسد شھریانی تاوان ءِ زمہ وار اَنت۔
زانگ بہ بیت کہ بلوچ لبریشن آرمی ءَ 2024 ءَ پاکستان ءَ 119 شھری کُشتگ یا ٹپیگ کتگ کہ اے رپورٹ ءِ تہ ءَ برجمیں رنگے ءَ ھوار اِنت۔
بلوچ لبریشن آرمی 2024 ءَ ھم تراکناکیں سلاھانی کارمرد کنوکیں مزنیں در ریاستی گلانی تہ ءَ ھوار بوتگ ءُ کلیں لس مردمانی بیرانی ءِ 15 درسد ءِ ذمہ وار بوتگ کہ 2023 ءَ ریکارڈ بوتگیں 22 وئیلانی مکابلہ ءَ 440 درسد گیش اِنت۔
رپورٹ ءِ رد ءَ 54درسد (423) شھری ءِ بیرانی یا ٹپیگ ءِ ذمہ وار ناشناسیں در ریاستی کارکن بوتگ اَنت کہ 2023 ءَ 541 شھری آماچ بوتگ اَنت۔
پاکستان ءِ تہ ءَ سرجمیں وت کُش اُرش در ریاستی کارکناں کتگ اَنت ، ھاسیں رنگ ءَ بلوچ لبریشن آرمی کہ 2024 ءَ بوتگیں 9 وت کُش اُرشانی تہ ءَ ایوک ءَ 2 درسد ءِ ذمہ وار بوتگ بلے اے وئیلانی تہ ءَ 89 درسد (92) بیران بوتگیں مردمانی ذمہ وار بی ایل اے بوتگ ۔
ناشناسیں در ریاستی کارکن 6 درسد (5) وت کُشی ءِ اُرشانی ذمہ وار بوتگ اَنت کہ ایشی ءِ آسر ءَ 11 درسد شھری ءِ بیرانی بوتگ۔
سرجمی ءَ پاکستان ءَ 2014 ءَ چہ گیش 2024 ءَ ناشرکاری ءِ وئیل ریکارڈ کتگ اَنت وھدے کہ 2018 ءَ پد شھری ءِ بیرانی ءِ رد ءَ دومی لمبر ءَ اِنت وھدے کہ گوستگیں سال ءَ 2015 ءَ پد سلاہ بندیں باسک ءِ نیمگ ءَ بیرانی ءِ رد ءَ دومی نمبر ءَ اِنت۔