زھری ءَ ڈیتھ اسکواڈ ءِ کارندہ خالد لاشاری ءِ کوش ءُ کلات پولیس چوکی سر ءَ دستیگ کنگ زمہ واری بی ایل ایف ءَ منّ اِتگ اَنت

بلوچستان لبریشن فرنٹ ءِ جارکش میجر گوھرام بلوچ ءَ کلات ءَ پولیس چوکی سر ءَ دستیگ کنگ ءُ سلاھانی برگ ءُ زھری ءَ ڈیتھ اسکواڈ کارندہ ء کوش زمہ واری منّ اِتگ-

بلوچستان لبریشن فرنٹ ءِ جارکش میجر گوھرام بلوج ءَ رسانکدر ءَ وتی شنگ کتگیں درشان ءِ تہ ءَ گْوشتگ کہ نوزده مئی 2025 ءَ شپ ءِ ھشت ءُ چل ءَ بی ایل ایف ءِ سرمچاراں گل ءِ چیریں ھالانی بنیاد ءَ ھزدار ءِ ھند نورگامہ، زھری ءَ خالد لاشاری ء مولا بخش جھمنند زھری تیرگواری کرتگ ءُ کشتگ۔

جارکش ءَ گوشتگ کہ کشگ بیتگیں ھالد لاشاری جھالاوان ءَ گوں زورگریں پاکستانی پوج ءِ بنجاھی چریک شفیق احمد مینگل ءِ ڈیتھ اسکواڈ ءَ بندوک بیتگ کہ ھزدار ءُ کش ءُ گوراں بلوچ ورناھانی زوریں بیگواھی ءُ بلوچ ءِ چکچینی ءَ تچک ءَ ھوار بیتگ، چریشی ءَ سرمچاراں گل ء پیسلہ ءِ رد ءَ اے کاروائی کتگ ءُ میاربار گڈی آسر ءَ سر کرتگ۔

جارکش میجر گھرام بلوچ ءَ خالد لاشاری ءِ کوش ءِ زمہ واری من اتگ ءُ گوشتگ کہ ڈیتھ اسکواڈ ءِ گون ءَ ھواریں کارندھاں گوشگ لوٹ ایں کہ آ گوں بی ایل ایف ءِ دمگی زمہ واراں ھال بہ کن اَنت ءُ وتی میاراں بہ من اَنت ءُ آؤکیں وھد ءَ گوں دژمن ءَ وتی سیادی ءَ ھلاس بہ کن اَنت ، اِے درگت ءَ کول بہ کن اَنت کہ پہ وتی زبان ءِ سر ءَ گوں مھکمی ءَ اوشت اَنت گڑا بی ایل ایف آیاں پھل کنت ءُ پہ میارانی بکشگ ءُ ایمنیں زندمانے ءِ گوزینگ ءَ موہ دے اَنت، اگاں نہ آ نشانگ کنگ بنت۔

جارکش ءَ وتی دگہ درشانے ءِ تہ ءَ گْوشتگ کہ بیست مئی ءِ شپ ءِ یازدہ نیم نزیک ءَ بلوچستان لبریشن فرنٹ ءِ سرمچاراں کلات ءِ شھر شاپنگ دگ سر ءَ برجاھیں پولیس چوکی انگیر ءَ کتگ اود ءَ ساڑی سرجمیں پولیس کارندہ یرگمال کتگ اَنت ءُ چیک پوسٹ ءَ ھستیں سرکاری سلاہ وتی دستیگ کتگ اَنت-

جارکش ءَ گْوشتگ کہ سرمچاراں ڈیوٹی سر ءَ ساڑی پولیس کارندھاں جُست پُرس ءَ پد آ ھچ وڑیں تاوان دیگ ءَ بید یل داتگ اَنت پرچاکہ اشانی تہ ءَ ھچ کس ءِ ھلاپ ءَ بلوچ زرمبشت آجوئی ھلاپ پُرکاریاں ھمگرنچی ءِ منانک نہ رس اِتگ-

جارکش ءَ گْوشتگ مئے گل کلات شھر پولیس چوکی سر ءَ دستیگ ءُ سرکاری سلاھانی دستیگ کنگ زمہ واری ءَ منّ اِیت-