چارشمبے ءِ سھب ءَ بلوچستان ءِ دمگ ھزدار ءَ بوتگیں تراک ءَ پد شھر ءَ گر ءُ داری ءِ ھاتر ءَ سیکورٹی ترند کنگ بیتگ-
تراک ءَ پد دمگ ءِ سر ءَ بالی گراب بال کنگ ءَ گندگ بوتگ اَنت۔ دمگی مردمانی رد ءَ تراک ءَ پد سیکورٹی پورسز ءَ دمگ انگر کتگ ءُ سرچ آپریشن بندات کتگ ۔
ٹپیگ زوت نادراھجاہ ءَ سر کنگ بوتگ اَنت بلے نادراھجاہ پہ لس مردم ءُ رسانکدر ءَ بند کنگ بوتگ۔
پاکستانی لشکر ءُ ڈپٹی کمشنر ءِ گشگ اِنت کہ اے تراک اسکول ءِ زھگانی بس ءِ سر ءَ بوتگ بلے لھتیں ھالانی رد ءَ کہ فوجی ادارہ لس مھلوک ءَ را گمراہ کنگ ءِ جھد ءَ اَنت ءُ ٹپیگیں فوجی کارندہ تپلیں زھگانی رنگ ءَ پیش دارگ بوگ ءَ اَنت۔
البت اے ھال انگت ءَ ھچ وڑیں آزات ءُ مزنیں واکدارقنی نیمگ ءَ چہ پدر نہ بوتگ۔
دومی نیمگ ءَ پولیس ءَ برطانیہ ءِ ھال رسانکدر ءَ گْوشتگ کہ تراک ءَ بس سرجمی ءَ تباہ بیتگ ءُ بس ءِ نزیک ءَ یک کسانیں گاڑی یے ھم تباہ بوتگ۔
آئی ءَ گْوشتگ اگاں چہ پٹ ءُ پول انگت برجاہ اِنت بلے انچوش سما بیت کہ تراکناکیں چیز ھمے کسانیں گاڑی ءِ تہ ءَ بوتگ اَنت۔ آئی ءَ گْوشتگ کہ اے گپ انگت ءَ پدر کنگ نہ بیت کہ اے تراک ریموٹ کنٹرول ءَ زور ءِ تراک کنگ بوتگ اَنت یا وت کُشیں بمب تراک کنوک ءِ نشانگ جوڑ کنگ بوتگ اَنت۔