بلوچ یکجھتی کمیٹی ءِ رھشون ءَ انسانی ھکانی باسک ڈاکٹر ماہ رنگ بلوچ ءُ سنگتانی دزگیری ءُ زورانسری آوار جنی ءِ ھلاپ ءَ زھرشانی روانک کشگ بیتگ-
اے زھرشانی بی وائی سی ءِ بُنجاھی جار پد ءَ کنگ بیتگ، کہ اود ءَ زالبول ءُ چُکانی مزنیں کچے ءَ ھوار بیتگ اَنت – زھرشانی کنوکانی دستاں زورانسری بیگواھیں مردمانی اکس، بی وائی سی ءِ بندیگیں سروک ءُ بینرز چست کتگ ءُ بلوچ چُکچینی ءِ ھلاپ ءَ ناراہ جنان ءَ میان استمانی ادارھاں چہ بلوچستان ءَ برجاہ انسانی ھکانی ھلاپ ورزیانی گامگیج لوٹ کتگ-
بی وائی سی رِد ءَ بلوچ یکجھتی کمیٹی ءِ نیمگ ءَ چہ مروچی پُرایمنی زھرشانی جار دیگ بیتگ، زھرشانی شاھوانی اسٹیڈیم نزیک ءَ پچیں پڑ ءَ بیگی بیتگ، بلے ریاست پاکستان ءِ گنڈہ آیانی تہ ءَ ھکومت بلوچستان، شال انتزامیہ، سی ٹی ڈی ءُ پولیس پیسر ءَ چہ پیسلہ کتگ کہ بلوچ راج ءُ بی وائی سی زھرشانی موکل نیست ءُ آئی ءَ گْوشتگ اے ریاست ءَ بلوچ راج واستا یک جتائیں کانودے جوڑ کنگ بیتگ- کہ ھما مردم زلم ءِ ھلاپ ءَ گپ بہ کنت ءُ ھک ھاتر ءَ توار چست کنت، آئی ءَ دزگیر بہ کن، بجن، بیگواہ بہ کن ءُ پد ءَ لاش دور دے – دومی نیمگ ءَ سرجمیں سیاسی پارٹی ءُ ریاستی وپادار ھر جاہ مُچی ءِ اجازت ھست-
آیاں گْوشتگ کہ شال ءِ ریڈزون نزیک ءَ فلسطین ءُ عزہ ءِ واستا مُچی ءِ اجازت ھست بلے بلوچ ءَ یک پڑے ءَ ھم اجازت نیست- اے پالیسی اے ریاست ءَ تھنا بلوچ راج ءِ توار ایرموش کنگ واستا جوڑ کتگ-
آیاں گوشتگ کہ پیسر ءَ اے ریاست ءُ اشی ءِ وپاداریں ھکومت ءَ اے ٹاہ داتگ کہ بی وائی سی دگ ءَ بند کنت ءُ راج را دلسیاھی دیمپان کنت- بُتیں ھکومت وتی رسانکدر ءُ جھان ءَ گوش اِیت کہ بی وائی سی ایر گچین کتگیں جاھاں زھرشانی کت کنت آیانی تہ ءَ پریس کلب ءُ شاھوانی اسٹیڈیم آیاں وت گچین کتگ- بلے اشانی مناپکت ءَ بچار اِت کہ اود ءَ ھم سر بیتگ ءُ زھرشانی ھلاس کنگ جُھد اش کتگ- نی ما ھدے دگ ءَ بند نہ کنگ ءَ ایں بلے پد ءَ ھم پولیس زھرشانی جاہ ءَ پیسر ءَ چہ مزنیں کچے ءَ سر بیتگ ءُ مردم دزگیر کتگ اَنت-
بی وائی سی رِد ءَ تاں انو یک درزنے ءَ گیش مردم دزگیر کنگ بیتگ- سرجمیں سریاب ءَ ھرجاہ ءَ پولیس گشت برجاہ ءَ اِنت ءُ بلوچستان شھدربرجاہ ءَ مزنیں کچے ءَ پولیس ءِ کارندہ، بکتر بند گاڑیانی ھمراھی ءَ جاڑیگی گوم ءَ اوشتاتگ اَنت-
آیاں ءَ گْوشتگ بلوچ راج ءَ جیڑگ لوٹ اِیت کہ پرچا اشی ءَ وتی سرڈگار سر ءَ زھرشانی ھک نیستب، پرچا اے ریاست ءُ آئی ءِ ادارہ بلوچ ءَ را انسان سرپد نہ بنت- اشی ءِ واستا مارا درستاں گھگیری کنگ لوٹ اِیت ءُ اے ریاست ءِ ھرچ جرم ءَ جھان دیم ءَ آرگ لوٹ اِیت- وھدے ھرچ زبان سر ءَ اے جُست بیت گُڑا ریاست چُنت ءَ بے توار کنت- ما اے در انسانی، در کانودی ءُ کالونئیل نزام ھلاپ ءَ توار چست کن ایں-