زورانسری آوار جنی ءُ ریاستی زوراکیانی بگیری ءَ بی وائی سی ءِ ھاران ءُ گڈانی ءَ زھرشانی

بلوچ یکجھتی کمیٹی ءِ نیمگ ءَ بلوچستان ءَ زورانسری آوار جنی، دروگیں میڑ، گل ءِ رھشون ءُ باسکانی دزگیری ءُ ریاستی زوراکیانی بگیری ءَ زھرشانی زرمبش ءِ درچ برجاہ انت –

گل ءِ ھمے زوتاں جتگیں جار ءَ پد ءَ مروچی ھاران ءُ ھب چوکی ءِ تیاب دپی دمگ گڈانی ءَ درنگاز کنوک مزنیں کچے ءَ دگانی سرا در اتکگ انت ءُ وتی پُرایمنیں زھرشانی نبشتہ کنائیں اِتگ –

بی وائی سی ءِ جار ءِ رِد ءَ اے زھرشانی بلوچستان ءَ انسانی ھکانی لگتمالی ءَ ھوار زورانسری آوار جنی، دروگیں میڑ ءُ بلوچ سیاسی باسکانی دزگیری ءِ بگیری ءَ کنگ بوگ ءَ انت –

جار ءِ تہ ءَ گوشگ بوتگ کہ ماھرنگ بلوچ، بیبو بلوچ، گلزادی، بیبرگ ءُ شاھ جی ءِ دزگیری ءَ پد آمیدگس ءِ انساپ دیگ ءَ دیری ءُ سرکار ءِ بے وسی راج ءِ تہ ءَ گیشتر زھر ءُ نپرت پیداک کنت –

ھاران ءِ مروچیگیں روانک نواب اکبر ھان بگٹی ءِ گوازی پٹ ءَ بندات کنگ بوتگ پدا بازار ءِ جتا جتائیں راھاں اوگام جنان ءَ آسر کنگ بوتگ –

درنگاز کنوکانی تہ ءَ زالبول ءُ زھگاں ھوار کماشاں ھم مزنیں کچے ءَ بھر زرتگ کہ آیانی دست ءَ پلے کارڈ ءُ بینر بوتگ انت کہ آیانی سرا زورانسری آوار جنی ءِ ھلاس کنگ ءُ بیگواھیں مردمانی یل کنگ ءِ لوٹ نبشتہ بوتگ انت –

ھمے وڈ بی وائی سی لسبیلہ چیپٹر ءِ رِد ءَ ھب چوکی ءِ تیاب دپی دمگ گڈانی ءَ ھم پرایمنیں روانک ءِ کشگ بوتگ کہ اودا ھندی مردماں تران کنان ءَ بی وائی سی ءِ باسک ءُ ریاستی زوراکی ایرجتگ ءُ راج ءَ چہ لوٹ کتگ کہ توار چست بہ کن انت –

گل ءِ رِد ءَ اے زھرشانی بی وائی سی ءِ شاھگانتریں زھرشانی ءِ درچانی بھر انت کہ آیانی مول بلوچستان ءَ ریاستی زوراکیاں ھوار زورانسری آوار جنی ءُ درکانودی کارانی بگیری ءَ راج ءَ باسما کنگ – چدوپیش تربت، مستونگ، پنجگور ءُ ھب چوکی ءَ ھم ھمے دابیً زھرشانی ءُ روانک کشگ بوتگ انت –

اے میان ءَ بی وائی سی ءَ وت ءَ پدر کتگ کہ آیانی پُرایمنیں زھرشانی زرمبش تاں ھما وھد ءَ برجاہ مان ایت تانکہ زورانسری آوار جنگ بوتگیں مردم یل نہ بنت – دزگیریں رھشون انساپ دیگ نہ بنت ءُ بلوچستان ءَ ریاستی ادارھانی زوراکی ھلاس کنگ نہ بنت –