چہ بلوچستان ءِ دمگ مستونگ ءَ دہ روچ پیسر پاکستانی لشکر ءِ دست ءَ بیگواہ بیتگیں ورنا ءِ لاش دزکپتگ-
لاش ءِ پجار محمد فھد لھڑی ءِ نام ءَ بوتگ کہ 4 مئی ءَ زورانسری بیگواہ کنگ بوتگ۔
محمد فهد محمد اقبال لھڑی ءِ بچ بیتگ۔ آئی ءِ لاش ءِ دزکپگ ءَ دمگ ءَ دردمانی ءُ گم ءُ رنج تالان بیتگ۔ ھاندان ءِ مردم ءُ انسانی ھکانی جھدکار اے وئیل ءِ سر ءَ سکیں دلپدردی درشان کنگ ءَ اَنت۔
اے ماہ ءَ بلوچستان ءَ 16 لاش دزکتگ انت کہ ایشانی تہ ءَ 8 لاش زورانسری بیگواہ کنگ بوتگیں مردم بیتگ اَنت ءُ یک ورناھے زورانسری بیگواھی ءَ پد یل بیتگ ءُ پد ءَ نشانگ کنگ ءُ کشگ بیتگ-
دزکپتگیں لاشانی تہ ءَ چہ پنجگور ءَ سئے، تربت ءَ چہ سئے، خضدار ءَ یکے ءُ مستونگ ءَ چہ یکے دزکپتگ انت۔
بلوچستان ءَ اے سال ءَ زورانسری بیگواہ کنگ ءُ بندی جاہ ءَ کوش ءِ لاشانی تہ ءَ گیشی گندگ بوتگ۔ بیگواہ کنگ ءِ ھلاپ ءَ کار کنوکیں سیاسی گل ءُ گلاں اے وئیلانی سر ءَ دلپدردی درشان کتگ ءُ لوٹ کرتگ کہ پاکستانی سرکار بیگواھیں مردماں آمیدگساں پیش بہ کنت۔
بیگواھی، کوشانی ھلاپ ءَ توار چست کنوکیں توار بلوچ یکجھتی کمیٹی ءِ سروک ڈاکٹر ماہ رنگ بلوچ ءُ گوں دگہ ھمراھاں بندیگ کنگ بیتگ ءُ آ تھری ایم پی او ءِ درچ ءَ بندیگ انت-