شال ءَ دزگیریں بی وائی سی ءِ رھشونانی وکیل چہ بلوچستان مزن آمیدگس ءَ دلپروش

بلوچستان ءِ مزن آمیدگس ءَ بلوچ رھشونانی زمانت ءِ بنگپ، وکیل ساجد ترین ایڈوکیٹ ءِ چہ آمیدگس ءِ سر ءَ دلپروش –

شال ءَ بلوچستان مزن آمیدگس ءَ بلوچ یکجھتی کمیٹی ءِ دزگیریں رھشونانی زمانت ءِ ارزی ءِ وھد ءَ نامداریں وکیل ساجد ترین ایڈوکیٹ ءَ آمیدگس ءِ سر ءَ دلپروشی درشان اِتگ ءُ بھتام جتگ –

گیشین ھالانی رِد ءَ ساجد ترین ایڈوکیٹ ءَ چیف جسٹس اعجاز سواتی ءُ جسٹس عامر رانا ءِ برجم کتگیں آمیدگس نمبر 1 پیش بوتگ ءُ گوشتگ کہ اے جج ریاست ءُ ھاکم ءِ وش کنگ ءَ دلگوش انت، آئی ءِ گوشگ ات کہ آمیدگس ءَ سرکار باز سھولت داتگ نوں بس انت – من ءَ نوں اے آمیدگس ءِ سر ءَ ھچ ستک نیست –

ساجد ترین ءَ گوشتگ کہ من لوٹ آں منی کیس دگہ آمیدگسے ءَ برگ بہ بیت پرچاکہ من نوں اے ھُنرانی بھر بوگ نہ لوٹاں کہ انساپ ءِ بدل ءَ سرکار ءِ تلبداری بوگ ءَ انت –

آمیدگس ءَ ساجد ترین آمیدگس ءِ لگتمالی کنگ ءِ نوٹس دیگ ءِ گوشتگ کہ آئی ءَ پسو ترینتگ ءُ گوشتگ کہ زوت کن –

وکیل ءَ آمیدگس ءَ گوشتگ کہ آئی ءِ موکل 3 ایم پی او ءِ رِد ءَ دزگیر کنگ بوتگ بلے نوں سرکار آیانی بگیری ءَ ارزی ءَ پیش کنگ ءَ انت کہ کانود ءَ در انت –

آئی ءَ ججانی سر ءَ نگد کتگ ءُ گوشتگ کہ ھردو جج وتی سی وی ءَ تیار کنگ ءَ آں اگاں اے آمیدگس انساپ دات نہ کنت گڑا اد ءِ نندگ ءَ ھچ نپ نیست –

اے وھد ءَ آغا حسن بلوچ ھم آمیدگس ءَ ساڑی بوتگ –

زانگ بہ بیت ھمے سال ءِ مارچ ءِ ماہ ءَ یک زھرشانی نندانکے ءَ شال پولیس ءَ بلوچ یکجھتی کمیٹی ءِ رھشون ڈاکٹر ماھرنگ بلوچ، بیبو بلوچ، شاہ جی، بیبرگ بلوچ، گلزادی ءُ دگہ باسک لٹ شاپ کتگ ءُ پد ءَ دزگیر کتگ انت –

آیانی سر ءَ تھری ایم پی او ءِ رِد ءَ ارزی نبشتہ کنگ بوتگ ءُ آیانی یل کنگ ءِ کاگد رد کنگ بوتگ انت آیاں گوستگیں دو ماہ ءَ گیش انت کہ بندیگ انت –

آیانی وکیل آمیدگس ءِ سر ءَ ھمے بھتام ءَ جنگ ءَ انت کہ آیاں زور دیگ بوگ ءَ انت کہ اے کیس ءَ گیش دراج کش بہ دیاں – آمیدگس انساپ دیگ ءَ انکاری آں –