بلوچستان ءِ جتاجتائیں دمگ سلاہ بندانی نیمگ ءَ ناکہ بندی، لیویز چیک ءِ دستیگ، ڈیتھ اسکواڈ ءُ پوج سر ءَ اُرش

بلوچستان ءِ دمگ بارکھان ءَ سلاہ بندیں مردماں ناکہ بندی کتگ ءُ ھُزدار ءُ کچھی ءَ لیویز چیک پوسٹ دستیگ کتگ وھدے کہ کلات پوج سر ءَ بمب اُرشے بیتگ ءُ کولواہ ءَ ڈیتھ اسکواڈ کارندھانی سر ءَ اُرش –

گیشیں ھالانی رِد ءَ بارکھان ءِ دمگ راڑشم ءَ سلاہ بندیں مردمانی مزنیں کچے ءَ ناکہ بندی جتگ-

دمگی اِھوالکار رِد ءَ سلاہ بندیں مردماں دمگ ءِ تھی ءُ ڈنی راھانی سر ءَ گاڑیانی تُرندیں پٹ ءُ پول بندات کتگ-

دومی نیمگ ءَ کچھی ءَ ناشناسیں سلاہ بندیں مردماں یک لیویز چیک پوسٹے ءِ سر ءَ اُرش کتگ ءُ دستیگ کتگ- اُرشکاراں سلاہ ءُ دگہ سامان ھم برتگ اَنت-

ھمے وڑ ھُزدار ءِ دمگ گریشہ گونی ءَ سلاہ بندیں مردماں لیویز چیک پوسٹ سر ءَ اُرش کتگ ءُ دستیگ کتگ، سلاہ بندیں مردماں چیک پوسٹ ءَ ھستیں سرجمیں سرکاری سلاہ گوں وتی ھمراھی ءَ برتگ اَنت-

انچش کولواہ ءِ دمگ گشانگ ءَ سلاہ بندیں مردماں ڈیتھ اسکواڈ ءِ کارندھانی سر ءَ ھما وھد ءَ اُرش کتگ وھدے آ چار پرپٹ ءُ زمیاد گاڑی ءَ گوں دمگ ءَ گشت کنگ ءَ بیتگ اَنت اُرش ءِ آسر ءَ ڈیتھ اسکواڈ کارندھاں جانی تاوان ءِ ھال-

ھمے وڑ مروچی کلات ءِ دمگ گراپ ءَ ناشناسیں مردماں پاکستانی پوج ءِ بمب ڈسپوزل اسکواڈ ءِ پیادگی کارندہ ھما وھد ءَ تراک ءِ نشانگ کتگ اَنت وھدے آ راہ ساپ کنگ ءَ دلگوش بیتگ اَنت-

دمگی اِھوالکار رِد ءَ تراک ءِ آسر ءَ پوج ءِ کارندھاں جانی تاوان چست کنگ کپتگ-

واکدار ءَ تنی وھدے اے درگت ءَ ھچ وڑیں درشان شنگ کنگ نہ بیتگ-

زانگ بہ بیت اشی ءَ ساری اے دمگ ءَ پاکستانی پوج ءِ پوسٹ سلاہ بندیں مردماں اُرش ءِ نشانگ کتگ کہ آئی ءِ زمہ واری بلوچ لبریشن آرمی ءَ منّ اِتگ اَت-