بلوچستان ءِ جتا جتائیں دمگاں سئے مردمانی لاش دزکپتگ انت۔ پولیس ءُ لیویز ءِ کارندھانی رد ءَ اے وئیل پنجگور، واشک ءِ دمگ ناگ ءُ کچھی ءِ دمگ ڈھادر ءَ دزکپتگ اَنت۔
پنجگور ءِ پیری جھلگ ءِ دمگ ءَ یک مردے ءِ لاش دست کپتگ کہ تیر جنگ ءُ کشگ بیتگ۔ لاش پہ پجار ءِ ھاتر ءَ ٹیچنگ ھسپتال ءَ دیم دیگ بوتگ۔ بیران بوتگیں مردم ءِ پجار انگت ءَ پدر نہ بوتگ۔
لیویز ءِ بنشون ءِ رد ءَ ناگ ءِ بانسر ءِ دمگ ءَ سلاہ بندیں مردماں گوستگیں شپ ءَ یک مردمے چہ آئی ءِ لوگ ءَ آوار جتگ ءُ لھتیں دوری ءَ بانسر چھارائی پوائنٹ ءَ کُشتگ ءُ آئی ءِ لاش چگل داتگ۔
بیران بوتگیں مردم ءِ پجار ناگ بانسر ءِ نندوک جان محمد ءِ چک ملا داؤد ءِ نام ءَ بوتگ۔ لاش آر ایچ سی ھسپتال ءَ سر کنگ بوتگ۔ البت اے کوش ءِ مول ءُ مراد انگت ءَ پدر نہ بوتگ۔
دومی نیمگ ءَ کچھی ءِ دمگ دھاڈر چندرامی ءَ نامالومیں مردمے ءِ لٹ ءُ کٹ کتگیں لاش دست کپتگ۔ پولیس ءِ رد ءَ اے مرد ءِ گٹ دارگ ءُ کشگ بیتگ۔
لاش سول اسپتال ڈھاڈر ءَ سر کنگ بوتگ۔ ایم ایس سول ھسپتال ءِ ڈاکٹر محمد زاہد ءِ گشگ ءِ رد ءَ بیران بیتگین ءِ جسم ءَ ٹپ ءُ ٹورانی نشان پِر انت۔