جھاؤ گریشہ ءُ شال ءَ پاکستانی پوج سر ءَ بیتگیں اُرشانی زمہ واری بی ایل ایف ءَ منّ اِتگ اَنت

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں نُھ مئی شپ ھشت نزیک ءَ جھاؤ ءِ دمگ ڈولیجی ءَ زورگریں پاکستانی پوج ءِ بُنجل سر ءَ راکٹ لانچر ءُ دگہ مزنیں سلاھاں چہ اُرش ءِ نشانگ کتگ- دُژمن ءِ بُنجل سر ءَ سرمچاراں گولہ گواری ءُ تیرگواری یک ادارے ءَ تاں برجاہ بیتگ چریشی ءَ راکٹ لانچر ءِ بازیں گولہ آس داتگ- اُرش ءَ دُژمنیں پوج ءَ را مزنیں کچے ءَ جانی ءُ مالی تاوان چست کنگ کپتگ-

جارکش ءَ گْوشتگ کہ اُرش ءَ پد زورگریں پاکستانی پوج ءَ جتاجتائیں نیمگ لس آبادیانی سر ءَ مارٹر گولہ آس داتگ، بلے بلوچ سرمچار پہ سلامتی وتی مُھریں اوتاکاں سر بیتگ-

جارکش ءَ گْوشتگ کہ دہ مئی بیگاہ ءَ بی ایل ایف ءِ سرمچاراں ھُزدار ءِ دمگ گریشہ، سریج کراس نزیک ءَ سی پیک دگ سر ءَ پوج ءِ چوکی مزنیں سلاھاں چہ اُرش ءِ نشانگ کتگ ءُ چوکی سر ءَ بازیں گولہ آس داتگ- کہ چوکی ءِ تہ ءَ کپتگ ءُ چریشی ءِ آسر ءَ زورگریں پوج ءَ جانی ءُ مالی تاوان چست کنگ کپتگ-

جارکش ءَ گْوشتگ کہ دہ مئی ءِ شپ یازدہ نیم ءَ بی ایل ایف ءِ سرمچاراں شال ڈگری کالج، سریاب نزیک ءَ برجاھیں پیرا ملٹری فورس فرنٹیئر کور ءِ چیک پوسٹ سر ءَ دستی بمبے چگل داتگ کہ بُنجل تہ ءَ کپتگ ءُ ترکّ اِتگ- چریشی ءَ تاوان ءِ دیمپانی کنگ کپتگ-

جارکش ءَ گْوشتگ بی ایل ایف جھاؤ، گریشہ ءُ شال ءَ زورگریں پاکستانی پوج سر ءَ بیتگیں اُرشانی زمہ واری ءَ منّ اِیت ءُ بلوچستان ءِ وتواجھی ءَ تاں زورگریں پوج ءَ نشانگ کن ایں-