بی ایل ایف ءَ پاکستانی پوج سر ءَ بیتگیں اُرشانی ءُ چاریگ کوش زمہ واری منّ اِتگ اَنت

بلوچستان لبریشن پرنٹ ءِ جارکش میجر گْوھرام بلوچ ءَ شنگ کتگیں دو جتاجتائیں درشان ءِ تہ ءَ کراچی، تمپ ءُ کلات ءَ سے جتاجتائیں اُرشاں زورگریں پوج، پولیس ءُ رینجرز نشانگ کتگ ءُ کلانچ ءَ ریاستی چاریگ کوش زمہ واری منّ اِتگ-

جارکش ءَ گْوشتگ بی ایل ایف ءِ سرمچاراں گوستگیں شپ ءَ کراچی ءِ دمگ ملیر، کالا بورڈ ءَ برجاھیں سندھ رینجرز ءِ پوجی چوکی ءِ سر ءَ دستی بمب ءَ چہ اُرش کتگ، اُرش ءَ آیاں جانی ءُ مالی تاوان چست کنگ کپتگ-

جارکش ءَ گْوشتگ دگہ یک اُرشے سے مئی ءِ بیگاہ ءِ ھپت ءُ پنجاہ ملٹ ءَ بلوچستان لبریشن فرنٹ ءِ سرمچاراں کیچ ءِ دمگ تمپ، کلاھو ءَ زورگریں پاکستانی پوج ءِ چوکی سر ءَ مزنیں سلاھاں چہ اُرش کتگ- چریشی ءِ آسر ءَ زورگریں پوج ءَ جانی ءُ مالی تاوان چست کنگ کپتگ-

جارکش ءَ گْوشتگ کہ دگہ یک اُرشے بی ایل ایف ءِ سرمچاراں بلوچستان ءِ دمگ کلات ءَ دربار دگ پولیس تھانہ ءِ سر ءَ دستی بمب ءَ چہ اُرش کتگ کہ تھانہ ءِ تہ ءَ کپتگ ءُ پولیس ءَ کمو تاوان رس اِتگ-

جارکش ءَ وتی دگہ یک شنگ کتگیں درشانے ءِ تہ ءَ گوشتگ کہ بیست ءُ ھپت اپریل 2025 ءَ بی ایل ایف ءِ سرمچاراں ریاستی چریک ءُ راجی میاربار زاھد ء واحد بخش جھمنند ناگی، کلانچ ءَ دزگیر کتگ ءُ آئی ءِ درگت ءَ سرجمیں جیڑہ ءُ بھتامانی جست ءُ پرس سرجم کتگ اَنت۔ زاھد ءِ درگت ءَ سرجمیں بھتامانی راست بوگ ءَ پد سی اپریل دوھزار ءُ بیست پنچ ءَ آ مرگ ءِ سزا داتگ ءُ گڈی آسر ءَ سر کتگ۔

جارکش ءَ گوشتگ کہ زاھد گل ءِ باسکے بوتگ ءُ 2015 ءَ آئی ءَ زورگریں پاکستانی پوج ءِ دیم ءَ سلاہ چگل داتگ اَنت۔ چریشی ءَ پد آ بازیں پوجی کاروائیاں زورگریں پاکستانی پوج ءِ ھمراہ بوتگ ءُ داں سرمچارانی اوتاکاں پاکستانی پوج ءِ سر کنگ ءِ کردے پیلو کتگ ئِے ۔

جارکش ءَ گوشتگ کہ بی ایل ایف گوں باسمائیں بلوچ پت ءُ ماتاں لوٹ کنت کہ اگاں آ سرپد بنت کہ آیانی کھول ءِ چونیں ھم مردمے چاریگی یا کہ آدگہ بلوچ ھلاپیں سُر ءُ پُراں ھوار اِنت گڑا درست ءَ چہ پیش وت آئی ءَ چہ اے کاراں بہ دار اَنت۔ اگاں انگت ءَ دارگ نہ بیت گڑا زوت مارا ھال بہ دے اَنت دانکہ آ چہ راجی تاوان ءَ رکّینگ بہ بنت۔

جارکش ءَ گوشتگ کہ ما گوں شری ءَ زان ایں کہ پہ کجام ھم کھولے ءَ آئی یک مردمے باز ارزیشت دار ایت۔ بلے راجی نپ ءُ آجوئی چہ درستیں سیادیاں دیم ءَ تر اِنت۔ دژمنیں پوج چہ بلوچ آبادیاں مُز ءِ نام ءَ بے میاریں مردماں زورگ ءُ آیاں بلوچ ھلاپ کارانی بھر جوڑ کنگ ءَ اِنت۔ گل اوست دار ایت کہ مئے راج چہ زورگریں پاکستانی پوج ءِ بلوچ دژمن ءِ پندلاں سرپد بیت۔

بلوچستان لبریشن فرنٹ ءِ جارکش میجر گْوھرام بلوچ ءَ گْوشتگ اے سرجمیں اُرشانی زمہ واریاں منّ ایں – مئے کاروائی ءُ جُھد بلوچستان ءِ وتواجھی ءَ تاں برجاہ بیت انت-