بلیدہ ءُ پسنی ءَ دو بلوچ ورنا زورانسری بیگواہ

بلوچستان ءَ زورانسری بیگواھیانی وئیل یک دردناکیں رنگے ءَ دیم ءَ آیگ ءَ انت کہ اود ءَ ھمک ورنا وتی زندگی ءَ زندانانی توک ءَ گندگ ءِ ترس ءَ انت-

بلوچستان ءَ ھمک روچ مردمانی بیگواھی ءِ وئیل رپورٹ بوگ ءَ انت کہ اود ءَ مردم گار ءُ بیگواہ ءُ پد ءَ کشگ ءُ چگل دیگ بوگ ءَ انت-

ھمے درچ ءَ بلوچستان ءَ زورانسری بیگواھیانی دَرچ برجاہ انت ءُ سر بیتگیں اھوالاں دگہ دو بلوچ ورنا پاکستانی پوج ءَ دزگیر کنگ ءُ ناشناسیں جاگاں برگ بیتگ انت-

گیشیں اھوالانی رد ءَ بلیدہ سلو ءِ جھمنندیں ورنا شاھنواز ء ھدامرزی ئیں ھاجی اللہ بخش کہ وتی کھول ءِ ھمراھی ءَ الاج ءِ ھاتر ءَ کراچی ءَ شتگ بیتگ 29 ءُ 30 اپریل ءِ میانی شپ ءَ کساس ساھت چار ءَ نیول کالونی ءَ چہ کراچی ءَ سرکاری ادارھانی دست ءَ بیگواہ کنگ بیتگ-

کھول ءِ رد ءَ شاھنواز وردیانی پوشاکی کارندھاں زورانسری وتی ھمراھی ءَ برتگ ءُ ایشی ءَ پد آئی ءِ بارو ءَ ھچ اھوال دیم ءَ نیتکگ انت-

کھول ءِ رد ءَ اے درگت ءَ ما تھانہ ءُ دگہ ادارھانی گور ءَ شتگ انت بلے ھچ جاہ ءَ گلائیگی پسو نہ رس اتگ-

شاھنواز ءِ کھول ءُ کھول ءَ، سرکار، انسانی ھکانی گل، مزن آمیدگساں لوٹ کتگ کہ آ دزمانجنی بہ کن انت ءُ شاھنواز ءَ یل بہ کنائین انت-

آیاں گوشتگ اگاں ورنا ءِ سر ءَ بھتام ھست انت گڑا آ آمیدگس ءَ پیش کنگ بہ بیت انت، گڑا گیر کانونی بندیگ ءُ بیگواہ جوانیں کارے نہ انت-

دومی نیمگ ءَ چہ پسنی ءَ یک دگہ ورنایے بیگواہ کنگ بیتگ-

اھوالانی رد ءَ وارڈ 3 باگ بازار ءَ سیادی داروکیں ورنا شَے مرید حسین چہ پسنی بازار ءَ یک ھجامے ءِ دکان ءَ ناشناسیں مردماں آوار جتگ ءُ بیگواہ کتگ کہ چریشی ءَ پد آ بیگواہ انت-

گوستگیں بیست ءُ چار ساھتانی توک ءَ پسنی ءَ چارُمی وئیل انت ءُ سرجمیں بلوچستان ءَ 19 کیس رپورٹ بیتگ انت-