بلوچستان ءِ تیابدپی شھر گوادر ءِ ھند چہ پسنی ءَ بیگواھیں مردمے یل بیتگ ءُ آئی ءِ جاور ناگیگی ءِ سبب ءَ کراچی ءَ برگ بیتگ-
گیشیں اھوالانی رد ءَ دو روچ پیش پاکستانی پوج ءِ دست ءَ بیگواہ بیتگیں نودربر عامر داد بخش ناگیگیں جاوراں یل دیگ بیتگ – کھول ءِ رد ءَ بنداتی الاج ءَ آ پاک عمان ھسپتال ءَ بیتگ ءُ پد ءَ گشادی کراچی ءَ برگ بیتگ-
اھوالانی رد ءَ آ سک لٹ ءُ کٹ کنگ بیتگ ءُ آئی ءِ جان ءِ جاور ناگیگ انت-
بلوچستان ءَ پاکستانی پوج ءِ دست ءِ یل بیتگیں مردمانی توک ءَ باز کم مردم سلامتی ءَ یل بنت انت-
اود ءَ گیشتریں مردم یا لاشانی دروشم ءَ دزکپ انت یا چپت ءُ چوپی ءِ دروشم ءَ دزکپ انت- کہ چریشی ءَ بازیں کچے ءَ ورنا اود ءَ سانمند انت-
پاکستان ءِ پوج ءِ دست ءَ گیشتر بندیگیں مردم کُشگ ءُ چگل دیگ بوگ ءَ انت کہ ھمے زوتاں زیارت ءُ دکی ءَ یک درزنے ءَ گیش مردم کُشگ ءُ چگل دیگ بیتگ انت کہ دکی ءَ دزکپتگیں مردم کہ دیم پہ دیمی ءِ نام ءَ کشگ بیگ ءِ نام دیگ بیتگ ات آ درست بیگواھیں مردمانی ناماں پجار بیتگ انت –
ھمے وڑ ھمے زوتاں زیارت ءَ سی ٹی ڈی ءَ ھپت مردمانی دیم پہ دیمی کُشگ ءِ ٹاہ داتگ ات کہ ایشانی لاش شال ءَ سیول ھسپتال ءَ ارگ بیتگ انت کہ ایشانی توک ءَ یکے ءِ پجار بیگواھیں مردمانی نام ءَ بیتگ ءُ آ دگرانی پجار انگت ءَ زانگ نہ بیتگ انت-
بلوچ مھلوک ءِ گوشگ انت سی ٹی ڈی بندیگیں ورنایاں جنگ ءُ کُشگ ءُ چگل دنت ءُ پد ءَ آیاں ناشرکار پدر کنت ءُ دیم پہ دیمی جنگ ءِ نام دیگ ءَ انت کہ مھلوک ایشی ءَ تچک ءَ رد کنگ ءَ انت-