مستونگ ءِ دمگ اسپلنجی ءُ آئی ءِ کش ءُ گوراں مرچی چارمی روچ ءَ پوجی کارروائی برجاہ بیتگ انت۔ اے دمگ ءَ مزنیں کساسے ءَ لشکری ءُ ھیلی کاپٹر ءُ نگرانی ڈرون کابوئی، تالخا کاوی ءُ ھمے کش ءُ گور ءِ کوہ ءُ میدانی دمگاں یکشل ءَ بال ءَ گندگ بوتگ انت۔
دمگی ھالانی رد ءَ سھب ءِ اولی بھر ءَ سیکورٹی پورسز ءِ کاروان یک رندے پد ءَ اسپلنجی ءُ نزیکیں دمگاں پترتگ اَنت کہ اود ءَ چیک پوسٹ گیش کنگ بوتگ اَنت ءُ روگ ءُ آیگی راھاں چیک ءُ تان کنگ بوگ ءَ اِنت۔ اے جاورانی سبب ءَ لس مھلوک سکیں مشکلانی آماچ انت۔
اے دمگ ءَ وھد وھد ءِ سر ءَ ٹوہ ءُ تیرگواری ءِ توار ھم اشکنگ بوتگ بلے انگت ءَ سرکاری تکاں ھچ وڑیں تاوان ءِ ھال شنگ نہ بوتگ۔ دمگی ھالانی رد ءَ لشکر ءَ بازیں لوگانی سر ءَ اُرش کتگ ءُ بازیں مردمانی دزگیر کنگ ءِ ھم ھال شنگ بوتگ۔
کابوئی ءُ تالخا کاوی ءِ کوھستانی دمگاں ھیلی کاپٹرانی گیشیں بالانی سبب ءَ اے ترس ءُ بیم گیش بوگ ءَ اِنت کہ اود ءَ پورسز مزنیں آپریشنے ءِ تیاری ءَ کنگ ءَ اَنت۔ ڈرون ءِ مدامیں نگرانی ءَ چہ دمگی مردمانی تہ ءَ گیشیں ترس ءُ بیم شنگ ءُ تالان بوتگ۔
یات بہ بیت کہ اسپلنجی ءَ برجاھیں فوجی آپریشن ءَ چار روچ اِنت کہ ایشی ءِ تہ ءَ زمینی اُرد ءِ ھمراھی ءَ برزی کمک کارمرد کنگ بوگ ءَ اِنت۔ اے وھد ءِ تہ ءَ بازیں شھریانی دزگیر کنگ ءُ زورانسری ءَ بیگواہ کنگ ءِ ھال ھم دیم ءَ اتکگ اَنت۔
آپریشن ءِ بابت ءَ انگت ءَ پاکستانی واکدارانی نیمگ ءَ ھچ وڑیں سرکاری بیان دیم ءَ آرگ نہ بوتگ انت وھدے کہ لھتے بلوچ سلاھبندیں گلاں فورسز ءِ سر ءَ اُرش ءِ زمہ واری زرتگ انت۔