بلوچ یکجھتی کمیٹی ءِ راھدربر ڈاکٹر ماہ رنگ بلوچ، بُنجاھی پیشوک بیبرگ بلوچ، بیبو بلوچ ءُ شاہ جی بلوچ گوستگیں پنچ روچ ءَ چہ زندان ءَ شُد کُشیں ھڑتال ءِ سر ءَ نشتگ بوتگ انت۔ شُد کُشیں ھڑتال ءِ سبب ءَ آیانی گوں تیزی ءَ طبیعت ناساز بوان بوتگ ات، وھدے چہ یک ماھے ءَ گیش زندان ءِ گوازینگ ءِ سبب ءَ آیانی جاندراھی چہ پیسر ءَ سان گپتگ ات۔ یکشل ءَ شُد ءُ گرمی سبب ءَ آیانی جاور گیش ھراب بوتگ انت۔
بی وائی سی ءِ رِد ءَ شُد کُش ھڑتال ءِ ھلاس کنگ ءِ ھاتر ءَ بلوچ چاگرد ءِ جتائیں پگری داروکیں ، سیادیں مردماں یکشل ءَ چہ بلوچ یکجھتی کمیٹی راھدربرانی گوم ءَ ھال ءُ اھوال بوتگ ءُ دزبندی کنگ ءَ بوتگ انت کہ آ وتی شُد کُش ھڑتال ءَ ھلاس بکن اَنت۔ مرچی، بلوچ گار ءُ بیگواھیں مردمانی کھولاں، سیاسی کھول ءِ ھانداناں ءُ سینئریں وکیلانی ھمراھیں یک مزنیں ٹیمے ءَ زندان ءَ شتگ انت ءُ چہ بلوچ یکجھتی کمیٹی ءِ راھدربراناں دزبندی کہ: “اگرچہ ریاست ءَ شمئے جان ءِ پرواہ نیست، بلے مارا شمئے زندگی ءِ ارزشت ءَ ایر کنیں؛ انچُشکہ دزبندی انت مئے شرپداری ءَ بکن اِت ءُ اے شُد کُشیں ھڑتال ءَ ھلاس بکن اِت۔”
انچُشکہ کہ زندان ءِ پھازوکاں بس ڈاکٹر ماہ رنگ بلوچ، شاہ جی بلوچ اور بیبرگ بلوچ ءِ کھول ءَ ءُ وکیلاناں چار ءُ گند ءِ موکل دیگ بوتگ۔ چار ءُ گند ءَ پد بلوچ یکجھتی کمیٹی ءِ راھدربرانی زورانسری بیگواھی ءِ زِبھر بوھوکیں کھول ءُ سینئریں وکیلانی شرپمندی ءَ وتی شُد کُش ھڑتال ءِ ھلاس کنگ ءِ سوڑگ کُت۔