سیمی روچ پوجی برّ ءُ برین ءِ میان ءَ دگ بندی،
سرویلنس ڈرونز ءِ کارمرز، گیشیں موٹلانی بوھوکیں کاروان ءِ ھند ءَ سربوگ۔
بلوچستان ءِ ھَند مستونگ ءِ ھلک اسپلنجی ءِ کِرّ ءُ کشاں پاکستانی لشکر ءِ آپریشن مرچی سیمی روچ ءَ ھم برجا اِنت اود ءَ لشکر ءِ بازیں کچے ءَ چہ مچھ ءَ اسپلنجی ءَ رَستگ۔
اسپلنجی ءَ لشکر ءِ آپریشن ءِ سیمی روچ ءِ میان ءَ ھلک ءَ دگ بندی برجا اِنت وھدے چہ لشکر ءِ نیمگ ءَ سرویلنس ڈرونز ءِ کارمرز کنگ بوگ ءَ اِنت۔
اسپلنجی برّ ءُ برین ءِ میانجی ءَ تاں انوگ ءَ چہ لشکر ءِ نیمگ ءَ بازیں جاھمنندیں مردمانی دزگیر کنگ ءَ پد گار ءُ بیگواہ کنگ ءِ ھال رَستگ۔
گوستگیں روچ ءَ پوجی آپریشن ءِ میان ءَ پاکستانی لشکر ءَ دکاندار ءُ دھکانانی دزگیر کنگ ءَ پد گوں وت بُرتگ انت چمیشاں چِہ دو ءِ پجّار یونس ء بشام ءُ بلال ء شیر اھمد ءِ نام ءَ چِہ زانگ بوتگ۔
ھمے سبب ءِ پُشدر ءَ ھندی جاھمنندیں مھلوکاں جاور ءِ ھلاپ ءَ ایف سی بُنجُل ءِ دیم ءَ زھرشانی کنگ بوتگ۔
زانگ بہ بیت کہ اے وھد ءَ بلوچستان ءِ دمگ مچھ، بولان، مستونگ ءُ کِرّ ءُ کشاں مزنیں کچے ءَ پوجیانی مان ریچگ ءِ ھال انت، اسپلنجی ءُ کِرّ ءُ کشاں پاکستانی لشکر ءِ زمینی پوج پد کنزی کنگ ءَ اِنت، پوج ءَ بکتر بند ءُ دگہ پوجی موٹلانی ھمراھی ءَ چہ بُرزی نیمگ ءَ ھم کمک گون انت۔
چہ ایشی ءَ پد گوستگیں روچاں بلوچستان ءِ ھَند پنجگور ءِ دمگ سبز کوہ ءُ کش ءُ گوراں چہ پاکستانی لشکر ءِ نیمگ ءَ آپریشن ءِ ھال رَستگ انت اود ءَ چہ لشکر ءِ نیمگ ءَ مارٹر گولہ جَتگ اِش۔
چہ پاکستانی ھکمرانی نیمگ ءَ بلوچستان ءِ جتائیں جاگھاں چہ برجائیں آپریشن ءِ ھوالہ تننگا چُشیں ھال ءُ اھوالی بیان دیم ءَ آرگ نہ بوتگ وھدے ھمے میان ءَ بلوچ آزاتی پسند سلاہ بندیں گلانی نیمگ ءَ آپریشن ءَ دزگٹیں لشکر ءِ سر ءَ اُرشانی زمہ واری منّ اِتگ۔