شال : سی ٹی ڈی ءِ میڑ ءَ دو مردم ءِ جنگ ٹاہ داتگ

شال ءِ دمگ رخشان ءِ مھکمہ انسداد ناشرکاری ( سی ٹی ڈی ) ءَ یک کاروائی ءِ میان ءَ میڑ ءَ دو مردم ءِ کوش ٹاہ داتگ – سی ٹی ڈی رِد ءَ، کُشگ بیتگیں مردم یک گلے ءَ چہ سیادی دار اَنت ءُ شھر ءَ اُرش ءِ شوربندی کنگ ءَ بیتگ اَنت-

سی ٹی ڈی واکدار رِد ءَ کاروائی ءِ میان ءَ یک کلاکے ءَ تاں تُرندیں تیرگواری ءِ رِد ءَ برجاہ بیتگ، چریشی ءَ یک مردمے ءَ تیر لگگ ءَ چہ بیران بیتگ، وھدے کہ دومی مردم گمانی ءَ وت ءَ بمب ءَ گون تراکینتگ بیران بیتگ-

کاروائی ءَ پد وئیلجاہ ءَ چہ یک وتکش جیکٹ، مزنیں کچے ءَ تراکناکیں شورو، گولہ بارود ءُ دگہ سلاہ دزکپتگ اَنت-

بلے سی ٹی ڈی ءِ اے کاروائی ءِ سر ءَ انسانی ھکانی گل ءُ جتاجتائیں پارٹیانی نیمگ ءَ چہ جُست چست کنگ بیگ ءَ اِنت – آیانی گوشگ اِنت کہ سی ٹی ڈی ءِ گوستناک ءَ ھم دروگیں میڑاں پیسر ءَ چہ بیگواھیں مردماں نشانگ کنگ ءَ اِنت-

ھمے ماہ نوزدہ اپریل ءَ ھم دُکی ءِ دمگ ءَ یک دروگیں میڑے ءِ میان ءَ سی ٹی ڈی پنچ مردم ءِ کُشگ ٹاہ داتگ، آیانی پجّار ہیسر ءَ چہ بیگواھیں مردماں چہ بیتگ اَنت-

دکی وئیل ءَ کشگ بیتگیں اعجاز دوازدہ اپریل دوھزار بیست پنچ ءَ پاکستانی پوج ءَ آئی ءِ ھمراہ زید ء عابد خان، جھمنند سریاب شال، ءِ ھمراھی ءَ آوار جتگ، چریشی ءَ پد دوئیں بیگواہ کتگ اَنت- ھمے وڑ محمد دین مری ھم چار ماہ ءَ ساری دزگیر کتگ ءُ بیگواہ کتگ اَنت-

اے کاروائی ءَ پد ترس پدر بیگ ءَ اِنت کہ درخشان ءَ بیتگیں وئیل ءَ ھم یک دروگیں میڑے بیت کنت-