بلوچستان ھائی کورٹ ءَ بلوچ یکجھتی کمیٹی ءِ دزگیریں سروکانی بارو ءَ ارزی ءِ سیمی بھر ءِ کیس گوشدارینتگ

بلوچ یکجھتی کمیٹی ءِ سروک ڈاکٹر ماہ رنگ بلوچ ءِ گوھار نادیہ بلوچ ءَ گوشتگ بلوچستان ھائی کورٹ ءَ مروچی بلوچ یکجھتی کمیٹی ءِ دزگیریں سروکانی بارو ءَ ارزی ءِ سیمی بھر ءِ کیس گوشدارینتگ-

ڈاکٹر ماہ رنگ بلوچ ءِ ھلاپ ءَ نوکتریں تھری ایم پی او ءِ تک ءَ کیس آمیدگس ءَ ڈب اتگ ءُ باندا گوشدارینتے –

ڈاکٹر ماہ رنگ بلوچ ماں جیل ءَ پھریزی ءُ سلامتی ءِ بارو ءَ درھواست ءِ سر ءَ آمیدگس ءَ دزبندی کنگ بیتگ ءُ مھکمہ داکلہ ءُ جیل ءِ واکداراں آیانی پھریزگ ءِ ستکی کنگ ءِ ھکم داتگ – آمیدگسی پرمان ءَ ڈاکٹر ماہ رنگ بلوچ ءِ پھریزی ءِ ھکم داتگ-

ھمے ڈول ءَ ڈاکٹر ماہ رنگ بلوچ ءُ سبگت اللہ شاہ جی ءَ دگہ جیلانی برگ ءَ آمیدگس ءَ ھکم داتگ کہ ھمے جیل ءَ کنگ بہ بنت اِنت- ھمے واستا گلزادی ءِ گوھار ءِ گور ءَ پجار کاڈ ءِ نہ بوگ ءَ آئی ءِ دراھواست ھوار کنگ نہ بیتگ-

ھمے ڈول ءَ ایڈوکیٹ ساجد ترین ءِ نیمگ ءَ نکش کتگیں دزبندی ءَ تھری ایم پی او ءِ تک ءَ نود ءُ دو سیاسی باسکانی دزگیری چیلنج کنگ بیتگ کہ چریشاں بیبو بلوچ ءُ دگہ باسک ھوار انت – آمیدگس ءَ بلوچستان ءِ سرکار ءَ پرمان داتگ کہ کم اُمرین ءُ ابید ءِ جرم ءَ دزگیر کتگیں مردماں زوت یل بہ کنت اِنت اگاں یل اش نہ کنت گڑا سبب گوشگ بہ بنت ءُ رپورٹ ءَ بیار ایت-

بلوچستان نیشنل پاٹی ءِ رھشون ءُ کانوندار ءُ بلوچ یکجھتی کمیٹی ءِ وکیل ساجد ترین ءَ وتی آفیشل ایکس ءَ گوشتگ مروچی آمیدگس ءَ دلیلاں پد بلوچستان ھائی کورٹ ءَ ھکم داتگ کہ ڈاکٹر ماہ رنگ بلوچ، بیبو بلوچ ءُ ماما گپار ءُ دگہ نود ءُ دو ءَ گیش باسک تھری ایم پی او ءِ تک ءَ دزگیر کتگیناں یل بہ کنت ءُ باندا رپورٹ ءَ آمیدگس ءَ پیش بہ کنت اِنت-

زانگ بہ بیت گوستگیں ھپتگ ءَ بلوچستان ھائی کورٹ ءَ ڈاکٹر ماہ رنگ بلوچ ءِ زمانت ءِ درھواست رد کتگ ات ءُ کیس ءِ گیش کاروائی کنگ ءَ سیکریٹری داکلہ بلوچستان ءَ دیم داتگ ات-

زانگ بہ بیت نامداریں بلوچ انسانی ھکانی باسک ڈاکٹر ماہ رنگ بلوچ ءُ بیبو بلوچ بیست ءُ دو مارچ دوھزار ءُ بیست ءُ پنچ ءَ شال ءَ یک پرایمنیں زھرشانی ءِ وھد ءَ بلوچ یکجھتی کمیٹی ءِ دگہ رھشونانی ھواری ءَ دزگیر کتگ ات ءُ آئی ءِ سر ءَ تھری ایم پی او ءِ ارزی نبشتگ کتگ ات کہ پاکستان ءَ گیشتر سیاسی باسکاں ابید ءِ کجام ھم ٹرائل ءَ دزگیر کنگ ءَ کارمرد بیت اِنت-

ڈاکٹر ماہ رنگ بلوچ، بیبو بلوچ، گلزادی بلوچ، شاجی سبگت اللہ، بیبرگ بلوچ ءَ ھوار بی وائی سی ءِ بازیں رھشون ءُ باسک داں انگت ءَ پولیس ءِ دزگیری ءَ انت کہ آ جتا جتائیں وھداں دزگیر کنگ بیتگ انت-